Тэрээһин туһунан 93 сыллаах выпуск лиидэрэ Варвара Максимова билиһиннэрэр:
- Кулун тутар 3 күнүгэр биһиги выпуск улуустарынан арахсаммыт волейбол, дартс, буулдьанан ытыы, остуол тиэнниһэ курдук успуорт көрүҥнэригэр күрэхтэстибит. Сунтаар, Үөһээ-Бүлүү, Кэбээйи, Томпо, Өлүөхүмэ, Ньурба, Нам, Амма, Уус-Алдан, Чурапчы, Таатта улуустарыттан барыта 64 киһи мустан, хамаандаларга арахсан (түөрт эр киһи, биэс дьахтар), илин-кэлин түсүһэн, күрэхтэстибит. Күрэхтэһии “ыалдьаччылара” сэргэхситтилэр. Күрэхтэһии сүрүн судьуйатынан Аркадий Ефремов буолла. Бу тэрээһиммит успуордунан дьарыктанар дьону сэргэ күрэхтэһиилэргэ өтөрүнэн кыттыбатах биир саастыылаахтары түмтэ. Ол курдук, оскуолаҕа үөрэнэр, устудьуоннуур кэмнэригэр волейболлаан баран мээчиги саҥа туппут дьон элбэхтэр. Эдэр сааспытын санаан, күрэхтэһии тыынын билэн, дуоһуйа алтыстыбыт. Күрэхтэһиибит аны үгэс быһыытынан сылын аайы ыытыллыаҕа. Эһиил өссө элбээммит, үрдүк таһымҥа күрэхтэһиэхпит диэн баҕа санаалаахпыт.
Тэрээһини ыытарга кыттыыны ылбыт, сүүрбүт-көппүт, күрэхтэһээччилэри муспут бука бары үөлээннээхтэрбитигэр барҕа махталбытын тиэрдэбит. Бу курдук туохтан да туора турбакка, “Бары бииргэ” дэбиистээх көхтөөх буолуоҕуҥ, эйэ дэмнээхтик бииргэ сылдьыаҕыҥ!
Күрэхтэһии сүрүн судьуйата Аркадий Ефремов:
- Күрэхтэһиибит этэҥҥэ ааста. Саамай сүрүнэ диэн туох да тыраамбата суох буолла. Кыттааччылар бары кыайыыга дьулуурдаахтарын көрдөрдүлэр. Чуолаан, волейболга тыҥааһыннаах киирсиилэр буоллулар. Бастакы тэрээһиммит буолан, улуустартан толору хамаандалар туралларыгар уустуктары көрүстүбүт. Онон Илиҥ Эҥэр, Бүлүү бөлөх уонна биирдиилээн улуустартан оонньооччулар хомуур (сборнай) хамаандалары туруораннар күрэхтэстилэр. Амма улууһа хара маҥнайгыттан көхтөөхтүк турунан, толору састааптаах хамаандаларын туруорбута биһиэхэ холобур буолар. Быйылгы күрэхтэһиибит итэҕэстэрин учуоттаан, эһиилги күрэхтэһиини элбэх киһини, улууһу хабан тэрийэр санаалаахпыт.
Волейболга дьахталлар хамаандаларыгар Амма улууһа эрэллээхтик кыайда, 2 миэстэҕэ уус-алданнар, 3 миэстэҕэ ньурбалар тигистилэр. Эр дьоҥҥо Илин Эҥэр (Таатта, Чурапчы) хамаандата чөмпүйүөннээтэ, 2 миэстэни Амма, 3 миэстэни Бүлүү бөлөх ыллылар.
Маны таһынан анал ааттарга тигистилэр:
«Бастыҥ туруорааччы» - Чирикова Күннэй (Амма), Матвеев Тихон (Амма);
«Бастыҥ көмүскээччи» - Кириллина Анна (Ньурба), Ли-Фу Владимир (Ньурба);
«Бастыҥ быһааччы» - Аммосова Мария (Уус-Алдан), Лукин Александр (Чурапчы);
«Бастыҥ оонньооччу» - Неустроева Мария (Амма), Ефремов Аркадий (Таатта).
Бастакытын ыытыллыбыт волейбол күрэхтэһиитин уопсай түмүгүнэн, көһө сылдьар куубагы толору оонньооччулаах, бастыҥ көрдөрүүлээх Амма улууһун хамаандата илдьэ барда. Куубак хаһаайыттара эһиилги күрэхтэһиини тэрийэргэ сүрүн күүс буолуохтара диэн эрэллээхпит.
Волейбол күрэхтэһиитин кэмигэр остуол тиэнниһигэр, дартска уонна буулдьанан ытыыга ким баҕалаах күөн көрүстэ.
Тиэннис күрэхтэһиитин Амматтан сылдьар Назаров Геннадий иилээн-саҕалаан ыытта. 1 миэстэни Неустроева Мария (Амма) ылла, Назаров Геннадий муҥутуур кыайыылааҕынан буолла.
Буулдьанан ытыыны Тааттаттан Яна Винокурова тэрийдэ уонна бэйэтэ күрэхтэһэн иннин кимиэхэ да биэрбэтэ. Муҥутуур кыайыылаах аатын Петров Владимир (Уус-Алдан) сүктэ.
Дартс диэн сонун көрүҥү Титова Наталия тэрийдэ. Ньурбаттан сылдьар Неустроева Алена бастаата. Муҥутуур кыайыылааҕынан Чурапчыттан Романов Николай буолла.
Маннык түмсүү биир саастаах көлүөнэни сомоҕолуур, сырдыкка-үтүөҕэ, успуорт эйгэтигэр тардар диэн санаалаахпын уонна 93 сыллаахха оскуоланы бүтэрбит үөлээннээхтэрбэр чөл туругу, уостубат көҕү баҕарабын.
Күрэхтэһии кыттыылахтара түһэрбит хаартыскалара.
-
6
-
0
-
0
-
0
-
0
-
0
