Мунньах (Суглан) бэрэссэдээтэлэ Юрий Егорович Шамаев иһитиннэрбитинэн, сессияҕа 5 көрүллүбүт боппуруостартан, биир сүрүн- СӨ ИДьМ Эдьигээн оройуонунааҕы салаатын 2023 сыллааҕы үлэтин отчуота буолла. Оройуон дьокутааттара олохтоох полиция салаатын начаалынньыга, майор Иван Варламов дакылаатын истэн, бэрээдэги араҥаччылааһыҥҥа, бэрээдэги кэһиигэ туһуламмыт боппуруостары биэрдилэр, чопчу буолбут түбэлтэлэринэн көрдүүр-ирдэһэр үлэ хайдах баран иһэрин, силиэстийэ түмүктэрин билистилэр, ыйытыылары биэрдилэр. Дакылаат, дьүүллэһии уонна сыаналааһын түмүгүнэн полиция салаатын 2023 сылга үлэтин сөптөөҕунэн билиннилэр уонна салгыы, 2024 сылга хонтуруоллааһын үлэтин саҥа таһымҥа таһаарарга, ыксаллаах ыҥырыыларга суһал дьайыыны оҥороллоругар санааларын эттилэр.
Билигин оройуоннааҕы Мунньах (Суглан) V-c Ыҥырыытын састаабыгар 2021 сыл балаҕан ыйын 19 күнүгэр ыытыллыбыт быыбарга талыллыбыт дьокутааттар норуот интэриэһин туруулаһаллар: Вадим Тарасенко, Яна Андреева, Юрий Шамаев, Александр Ким, Ньургустана Корякина (бары “Биир Ньыгыл Арассыыйа” партияттан), Айаал Софронов, Раиса Петрова, Иван Соломонов, Мария Попова, Күннэй Иванова(бары “Сиэрдээх Арассыыйа” партияттан),, Дмитрий Балыкин (“ЛДПР” партияттан), Надежда Владимирова, Лилия Борисова, Раиса Анисимова (“КПРФ” партияттан), Лидия Атласова (бэйэ туруорунуута).
Ону тэҥэ, Эдьигээн оройуонун дьокутааттара, муус устар 17 күнүгэр “Эдьигээн эбэҥки национальнай оройуонун” МТ дьаһалтатын 2023 сылга муниципальнай бүддьүөт туолуутун туһунан отчуоту бигэргэтэргэ анаммыт публичнай истиигэ кыттыахтара. 2023 сыллаах бүддьүөт туолуутун отчуотугар олохтоох бүддьүөт дохуоттаах, ороскуоттаах чаастарын, ону тэҥэ муниципальнай бырагыраамалар, бүддьүөт икки ардыларынааҕы трансфердар, бүддьүөт дэписиитин толорууларын уо.д.а. туһунан информациялары иһитиннэриэхтэрэ. Отчуоту истиигэ оройуон олохтоохторо сылдьан истэллэригэр ыҥырыы-биллэрии оройуон дьаһалтатын саайтыгар тахсан турар.
-
1
-
0
-
0
-
0
-
0
-
0
