Ил Түмэн Тыа сиригэр уонна аграрнай бэлиитикэҕэ сис кэмитиэтэ сэтинньигэ ыыппыт мунньаҕар бэтэринээринэй сулууспа туруга, инники былааннара көрүллүбүтэ. Онно улуустарга бэтэринээрийэ управлениеларын дьиэлэрэ-уоттара эргэрбитэ, тиэхиньикэ итэҕэһэ этиллибитэ.
Бу боппуруоска Бырабыыталыстыба улахан болҕомтотун уурар. Бырабыыталыстыба Бэрэссэдээтэлин солбуйааччы Сергей Местников бүгүҥҥү сүбэ мунньахха бэтэринээринэй сулууспа материальнай-тиэхэньиичэскэй базатын бөҕөргөтүүгэ туһуламмыт 2024-2028 сс. бырагыраама барылын билистэ. Бырагыраамаҕа эбийиэктэри тутуу, хапытаалынайдык өрөмүөннээһин, саҥа тиэхиньикэни атыылаһыы, лаборатория уонна дезинфекция тэриллэрин хааччыйыы киллэриллибиттэр.
Кэпсэтиини түмүктүүрүгэр, Сергей Местников бырагыраама барылын тыа хаһаайыстыбатын сайыннарыы судаарыстыбаннай бырагырааматын кытары дьүөрэлэһиннэрэргэ, үбүлээһин хайысхаларын тобуларга, чопчулуурга сорудахтаата. Эбийиэктэри модульнай тиибинэн тутары үөрэтэргэ эттэ.
Хаартыскаҕа: Ньурба бэтэринээрдэрэ көтөрү иитэр фабрикаҕа уочараттаах көрүү кэмигэр (Бэтэринээрийэ департаменыттан).
- 1
- 0
- 0
- 0
- 0
- 0