Уопсастыба

Егор Дмитриевич айылҕаттан кэми кэрэһэлиир, үйэтитэр ыйаахтаах бу Орто дойдуга төрөөн ааспыта. Дэгиттэр худуоһунньук, уус идэлээҕэ. Былыт саппыт ааспыты бу баардыы кэпсиир, өйүгэр тутар дьоҕурдааҕа. Кини “Саха сирин күнүн маҥнайгы календара”, “П.А.Ойуунускай төрдө-ууһа, аймахтара”, “Таатта отоһуттара”, “Таатта олоҥхоһуттара, ырыаһыттара” (икки чаастаах), “Баай аҕа ууһа Баайаҕа”, “Байанай алгыһыттан сэдиптээн”, “Оруоһуттар”, “Сэһэннэр-сэппэннэр”, “Баайаҕа”, “Олоххо тардыһыы күүһү”, “Таатта олоҥхоһуттара”, “Таатта ытык-бэлиэ сирдэрэ” (икки чаастаах), “Куома Чааскын”, “Таатта ытык-бэлиэ сирдэрэ” диэн өлбөт-сүппэт үйэлээх кинигэлэри суруйан хаалларбыта.

Андросов ааҕыыта 2015 сылтан ыытыллар. Манна оскуола оҕолоруттан саҕалаан, төрөөбүт дойду устуоруйатын, биллэр-көстөр үтүө дьоммут ааттарын үөрэтэр чинчийээччилэр кыттыыны ылаллар. Егор Дмитриевич олоҕун, айар үлэн кэпсиир быыстапка “Таатта” ЫКЛХМ-З, Саха сиригэр сыылка устуоруйатын сырдатар Чөркөөхөөҕү, улуустааҕы кыраайы үөрэтэр “Албан Аат”, Андросовтар учуутал династия аатынан Баайаҕа орто оскуолатын кыраайы үөрэтэр түмэллэрин пуондаларыттан көрдөрүүгэ турда. Быйылгы ааҕыыга Тааттаттан, Чурапчыттан кыттыыны ыллылар. Ааҕыылары тэрийээччилэри кытта Саха Сирин суруйааччыларын сойууһун бэрэссэдээтэлэ Гаврил Андросов дьүүллээтэ.

Ааҕыы түмүгүнэн оҕолорго 1-кы миэстэни Давид Кузьмин, И.Н.Гуляев аатынан Туора Күөллээҕи орто оскуола үөрэнээччитэ, 2-с миэстэни Валерия Осипова, А.Е.Мординов аатынан Тааттатааҕы лицей үөрэнээччитэ, 3-с миэстэни Денис Неустроев, И.Н.Гуляев аатынан Туора Күөллээҕи орто оскуола үөрэнээччитэ ыллылар. Улахан дьоҥҥо  1-кы миэстэни Антонина Неустроева, Н.Д.Неустроев аатынан орто оскуола түмэлин салайааччыта,  2-с миэстэни Валентина Блахирова, Н.Е.Мординов аатынан оскуола учуутала ыллылар, онтон 3-с миэстэ Чурапчыттан Любовь Григорьеваҕа тигистэ. Ааҕыыларга бириистэри Егор Андросов аймахтара Николай Луковцев, Таатта улууһун дьаһалтата, улуус  культураҕа, үөрэххэ салаалара, Баайаҕа нэһилиэгэ, “Техноторг” маҕаһыын,  кыраайы үөрэтээччилэр Федора Харитонова, Изабелла Сивцева оҥордулар.

Кыраайы үөрэтии норуот устуоруйатын тутаах хайысхата буоларынан, маннык ааҕыылар сыллата ыытыллан, төрөөбүт дойдуга бэринилээх буолууга, дойдунан киэн туттууну үөскэтиэхтэрэ, саҥаттан саҥа чахчыларынан сээркээн сэһэн кэпсэнэ, ааҕылла туруоҕа.