Ол курдук, олунньу 13 күнүгэр Ил Түмэн Судаарыстыба тутулугар уонна сокуону оҥорууга сис кэмитиэтигэр 18 боппуруоһу көрдүлэр. Онно биир бастакынан киирбит, СӨ ИДьМ 2024 сыллааҕы үлэтин түмүгүн туһунан иһитиннэриитигэр, сокуону араҥаччылыыр уорганнар төһө даҕаны араас миэрэлэри ылан үлэлээбиттэрин иһин, кибер түөкүннээһин таһыма олус үрдүгэ бэлиэтэннэ – уопсай буруйу оҥоруу ахсааныттан 33,8 % ылар.

Дьокутааттар ону тэҥэ полиция административнай дьиэлэрин өрөмүөннээһин, алкоголлаах бородууксуйа эргииригэр хонтуруолу олохтооһун, миграционнай бэлиитикэ уонна суолга куттала суох буолуу туругун туһунан боппуруостары көтөхтүлэр. Полицияҕа саҥа үлэһиттэри ылыыга туһулаан анал каадыр бырагырааматын, ону кытта кибер түөкүннээһини утары охсуһууга өрөспүүбүлүкэтээҕи бырагырааманы оҥорорго этиилэри киллэрдилэр. Эбии кыраасданнар тус бэйэлэрин дааннайдарын харыстааһыҥҥа миэрэлэри күүһүрдэргэ туруорустулар.

Ыытыллыахтаах сиэссийэҕэ  Мииринэй, Хаҥалас, Үөһээ Дьааҥы, Анаабыр, Ньурба улуустарын  мөрөбүөй судьуйаларын бигэргэтиэхтэрэ. Ону тэҥэ дьокутааттар судаарыстыбаннай сулууспа, судаарыстыбаннай наҕараадалар уонна быыбарга сыһыаннаах сокуон барылларын көрүөхтэрэ. Биир ураты болҕомтону эрэйэр боппуруоһунан дьиэ кыылын иитээччилэр, бас билээччилэр тус эппиэтинэһи сүгэллэрин туһунан сокуон барылын көрүү буолуоҕа. Мантан сорохторо бастакы ааҕыыны ааспыттарын бэлиэтиэххэ сөп.    

Хаартыска: Ил Түмэн саайт