Instagram социальнай ситимигэр кулун тутар 9 күнүттэн Арассыыйа уонна Украина туһанааччыларыгар сурутааччыларын туһунан информацияны көрдөрөрүн тохтотор.
- Биһиги Украина уонна Арассыыйа уопсастыбаларын көмүскүүр сыалтан бу икки дойдуга сурутааччыларын туһунан информацияны кистиэхпит,- диэн Meta хампаанньа сайабылыанньатын ТАСС иһитиннэрэр.
Маны сэргэ, кулун тутар 8 күнүттэн саҕалаан Instagram «сториска» дойду судаарыстыбаннай иһитиннэрэр-көрдөрөр хампаанньаларга сигэнэр сыылкалаах сонуннар, урут Facebook-ка оҥоһуллубутун курдук, инстаграм бэлиитикэтинэн сыһыарыы туһанааччыларыгар көрдөрбөт буолла.
- Бу уларыйыылар дойду судаарыстыбаннай иһитиннэрэр-көрдөрөр хампаанньалар Instagram нөҥүө тарҕатар сонуннарын хааччахтыыр, ону сэргэ биирдиилээн дьон сонуннары ылан тарҕаталларын аҕыйатар эбии хардыыларынан буолаллар, - диэн Meta хампаанньа быһаарар. Билиҥҥи туругунан Meta хампаанньа сыһыарыылара - Instagram уонна WhatsApp - Арассыыйа терроториятыгар үлэлииллэр, арахса иликтэр.
Бу иннинэ кылгас видеолары оҥорор, тарҕатар уонна көрдөрөр TikTok сервис фейк туһунан саҥа федеральнай сокуон ис барылынан Арассыыйа олохтоохторугар быһа эпиирдэри уонна видео таһаарыылары оҥорорго хааччахтааһыны олохтообута. Оттон YouTube сыһыарыыны уонна Zoom сервиһи блокировкалыыр туһунан, Роскомнадзор чуолкайдыырынан, быһаарыы ылыллыбатаҕа.
- Тас дойдулар Microsoft уонна Zoom IT-хампаанньаларын салалталара биһиги дойдубутугар ВКС-сервис үлэтин сорох чааһын эбэтэр толору тохтотор туһунан дьаһаллары ылыныахтарын сөп, - диэн Truecof-Арассыыйа b2b-сегмент видеокэмпириэнсийэ систиэмэтин оҥорон таһаарааччыта сабаҕалыыр.
Бу сыһыарыылары эбэтэр интэриниэт-сервистари бас билэр хампаанньалар Арассыыйа территориятыгар үлэлэтэллэрин туһунан быһаарыыны тус бэйэлэрэ ылыналлар.
Кинилэртэн хайалара эмэ букатыннаахтык үлэлэрин тохтотор туһунан быһаарыы ылынар түгэннэригэр, дойдубут гражданнара анал майгынныыр Арассыыйа сыһыарыыларын туһанар кыахтаахтар, холобур, видеохостинг Rutube, мессенджердар «ТамТам», «Агент Mail.ru» уонна ICQ, социальнай ситимнэр «Одноклассники», «ВКонтакте» уонна «Мой мир@Mail.ru», почта сервиһэ «Почта Mail.ru», көрдүүр систиэмэлэр «Поиск Mail.ru» уонна «Яндекс», видео-кэмпиринэсийэ сервистэрэ VK Workspace, «Телемост» «Яндекса», «Сбермитап» уонна Spirit Videomost бааллар.
Санаттахха, дойду Бэрэсидьиэнэ Владимир Путин Арассыыйа Сэбилэниилээх күүстэрин туһунан сымыйа сурахтары уонна дойду утары санкциялары киллэрии туһунан ыҥырыылары тарҕатыы иһин холуобунай буруйдааһын туһунан сокуону бигэргэппитэ.
-
0
-
0
-
0
-
0
-
0
-
0
