Ол туһунан Ил Түмэн уочараттаах алтыс пленарнай мунньаҕар муус устар 23 күнүгэр Ил Түмэн Бэрэссэдээтэлин солбуйааччы, бүддьүөккэ, үпкэ-харчыга, нолуок уонна сыана бэлиитикэтигэр, бас билии, приватизация боппуруостарыгар сис кэмитиэт бэрэссэдээтэлэ Юрий Николаев иһитиннэрдэ.
Бүддьүөт ороскуотун кээмэйэ 2024 с. 349,4 млрд. солк., 2025 с. 282,3 млрд. солк., 2026 с. 291,9 млрд. солк. Үп дэписиитэ 2024 с. 36,6 млрд. солк., 2025 с. 2,7 млрд. солк., 2026 с. 2,3 млрд. солк.
Норуот дьокутаата Александр Иванов бүддьүөккэ уларытыыны киллэрэр наадалааҕын бэлиэтээн туран, Саха Сирэ аан дойдуга буола турар ыксаллаах быһыыттан-майгыттан тэйиччи олорорун уонна сарсын балаһыанньа баҕар уларыйыа, мөлтүө диэн ким даҕаны санаан да көрбөтүттэн сонньуйарын биллэрдэ.
Кини дойду үрдүнэн экэниэмикэ көрдөрүүтэ түһэ турарын, оттон өрөспүүбүлүкэ 37 млрд. солк. бүддьүөт ороскуотун улаатыннарарын, өскөтүн сааҥсыйа өссө күүскэ ыктаҕына, дохуоппут түһүөн сөбүн сэрэттэ. Өскөтүн үп-харчы көрүлүннэҕинэ үлэһит дьоҥҥо кыра чиэппэрэ тиийэрин, улахан аҥаара ханна сөҥөрө биллибэтин эттэ.
«Биһиги экэниэмикэбит — биир киһи үлэлиир, оттон кинини сэттэ киһи салайар, хонтуруоллуур, итинник аат эрэ харата үлэлээбитэ буолаллар. Министиэристибэлэр, департаменнар үлэһиттэрин ахсаана тыа сирин үлэһититтэн быдан элбэх.
Билигин дохуоппутун улаатыннарар, ороскуоппутун аччатар кэм кэллэ. Кумааҕыны бэрийэр бюрократиянан дьарыктанар киһи наһаа элбэх, ол оннугар экэниэмикэ араас салаатыгар үлэһит тиийбэтиттэн киргиистэри, таджиктары ыҥырабыт. Сылаас хонтуораттан дьону таһааран, үлэлэтиэххэ наада. Өрөспүүбүлүкэ судаарыстыбаннай иэһин аччатарга, экэниэмикэ көдьүүһүн улаатыннарарга чунуобунньуктар ахсааннарын аҕыйатар тоҕоостоох», — диэтэ мунньахха саамай көхтөөхтүк тыл этэр дьокутаат.
-
4
-
1
-
0
-
1
-
1
-
0
