- Бу хайысхаҕа систиэмэлээх үлэ саҕаламмыта - өрөспүүбүлүкэбит духуобунай-култуурунай эйгэтигэр уларыта тутуу хамсаныыларынан Геокултуурунай сайдыытын института арыллыбыта. Салгыы институт сайдыытыгар бырабыыталыстыба сөптөөх быһаарыылары ылынарыгар сорудахтыыбын. Ону тэҥэ оройуоннарынан Олоҥхо дьиэлэригэр Саха сирин норуотун эпическэй нэһилиэстибэтин түмэр биир кэлим тиһигин тэрийии дьоһуннаах хамсааһын дии саныыбын. Бу систиэмэни ыытар улуустар уонна куораттар айымньылаах кэлэктииптэрин анал былаһааккатынан тутулла турар Аартыка уонна ускуустуба киинэ буолуохтаах.
Арассыыйаҕа уонна аан дойдуга уһулуччулаах култуурунай көстүүнэн буолбут саха кинематографията сүҥкэн ситиһиилэннэ. Өрөспүүбүлүкэ үрдүнэн 20-тэн тахса киинэ устуудьуйалара уонна айымньылаах кэлэктииптэр үлэлииллэр, уон сыл иһигэр 100-тэн тахса уус-уран киинэлэр уһуллубуттара. Арассыыйа уонна аан дойду үрдүнэн мөлүйүөнүнэн көрөөччүлэрэ биһиги киинэлэрбитин көрбүттэрэ. Судаарыстыбаннай Саха киинэтин өйөбүлүн туһунан өрөспүүбүлүкэ сокуонун оҥорорбут кэмэ тиийэн кэллэ. Биһиги кинематографистарбыт кыттыылаах бырабыыталыстыба уонна парламент бу хайысхаҕа күүстээх үлэни ыытаргытыгар көрдөһөбүн. Култуурабыт салгыы сайдыытыгар улахан төрүөтүнэн Саха АССР тэриллибитэ 100 сылын бэлиэтиэхпит. Күүтүүлээх үбүлүөйү көрсө куораттарга уонна оройуоннарга култуура дьиэлэрин, киинэ саалаларын тутууларын тэниттибит. 2022 сылга аныгылыы тутуулаах Ньурба тыйаатыра уонна Намҥа култуура Дыбарыаһа аһыллыахтара.
Д. К. Сивцев-Суорун Омоллоон аатынан Судаарыстыбаннай опера уонна балет тыйаатырга «Дьулуруйар Ньургун Боотур» опера саҥа туруоруутун премьерата ыытыллыаҕа. Өрөспүүбүлүкэҕэ Арассыыйа култууратын сүрүн тэрилтэлэрэ - Улахан тыйаатыр, Судаарыстыбаннай Третьяковскай галерея кэлиэхтэрэ. Бэс ыйыгар «Олоҥхо дойдутугар ЮНЕСКО шедеврдэрин көрсүһүүлэрэ» норуоттар икки ардыларынааҕы IV бэстибээл тэриллиэҕэ. Өрөспүүбүлүкэтээҕи Олоҥхо ыһыаҕа Үөһээ Бүлүү улууһугар, оттон 25-с үбүлүөйдээх Туймаада ыһыаҕа киин куоракка ыытыллыахтара. Үбүлүөйдээх сыл сүдү суолталаах түгэнинэн Уус-Алдан улууһун Бороҕон сэлиэнньэтигэр Саха сирин норуоттарын VII-с спортивнай оонньуулара ыытыллыаҕа. Бэс ыйыгар Дьокуускайга мас тардыһыытыгар Аан дойдутааҕы чөмпүйэнээтэ былааннаммыта – бу национальнай спорт көрүҥүн аан дойду таһымыгар таһаарарга өссө биир суолталаах хардыынан буолуоҕа.
Өрөспүүбүлүкэ бастакы Бэрэсидьиэнэ Михаил Николаев көҕүлээһининэн саҕалламмыт «Азия оҕолоро» норуоттар икки ардыларынааҕы спортивнай оонньуулар аан дойду спорт хамсааһыныгар туохха да тэҥнэммэт бэлэҕинэн ааҕыллар. Эһиил Владивосток куоракка буолуоҕа. Сотору кэминэн, 2024 сылга оонньуулар ыытыллар миэстэтин быһаарыыта ылыллыаҕа. Биһиги сайаапкабытынан, VIII «Азия оҕолоро» оонньуулара Саха сиригэр ыытыллыахтара диэн эрэнэбин, - диэн бэлиэтиир өрөспүүбүлүкэ баһылыга.
-
0
-
0
-
0
-
0
-
0
-
0
