Инникитин маннык балаһыанньа тахсыбатын иннигэр тугу гыныахха, туох миэрэни ылыахха? Амма улууһун дьокутааттарын Сэбиэтин бэрэссэдээтэлэ Софья Лаврентьевна Александроваттан санаатын үллэстэригэр көрдөстүбүт.
- Бэйдиэ сылдьар ыттары бэрээдэктээһин кыһалҕата турбута ыраатта. Соторутааҕыта эрэ биһиэхэ Бөтүҥ нэһилиэгин олохтоохторуттан сурук киирэн турар. Өйдүүргүт буолуо, бу күһүн манна оскуола оҕотугар ыттар саба түспүттэрин туһунан улахан айдаан тахса сылдьыбыта. Мин саныахпар, маннык быһылаан бэйдиэ сылдьар ыттарга сокуон ситэтэ суоҕуттан тахсар. Уопсастыбабытыгар ыкка киһилии сыһыан бигэтик олохсуйа илик. Көрөбүт дии, сорохтор сайын дачаларыгар сынньанан баран күһүн куоракка киирэллэригэр ыттарын илдьэ барымаары хаалларан кэбиһэллэрэ кытта баар. Ол түмүгэр хаһаайыннаах курдук санана сылдьыбыт ыт сүрдээҕин хомойор, кырыктыйар. Маннык ыттар мустан үөрдүһэллэр. Аны аччык ыт кыылын хаана киирэрэ кэмнээх буолуо дуо? Ол иһин киһиэхэ саба түһэллэр.
Билигин сокуон хараҕа туох диирий? Бэйдиэ сылдьар ыттары хомуйан приютка илдьиллиэхтээх, манна ветеринарнай кэтээн көрүүнү оҥорон, стерилизациялаан баран, 30 хонук иһигэр ким даҕаны ирдэспэтэҕинэ, сылдьыбыт эйгэтигэр төттөрү ыытан кэбиһэллэр.
Амма улууһугар өрөспүүбүүлүкэҕэ аан бастакынан ыты тутар приют оҥоһуллубута. Улуус баһылыга Николай Архипов уонна Амма нэһилиэгин баһылыга Михаил Артемьев көҕүлээһиннэринэн анал үлэһиттээх, ветеринарнай пууннаах приют аһыллан ити сокуоҥҥа олоҕуран үлэлиир.
Оттон ыт быһа холуйан 20 сыл олорор, ол тухары төһөлөөх элбииллэрэ буолуой? Онон бэйдиэ сылдьар ыттары мин саныахпар, тутуллубутун кэннэ 30 хонуга аастаҕына ыытан кэбиспэккэ, утутан кэбиһэр, суох гынар наада буолла. Бу боппуруоһунан Амма улууһун дьокутааттара Саҥа дьыллааҕы бырааһынньыктар кэннилэриттэн мустан дьүүллэһиэхтээхпит. Санааларбытын сурукка тиһэн Судаарыстабаннай Дума таһымыгар кэпсэтии тахсарын туһугар үлэни ыытыахпыт.
"Амма олоҕо" хаһыат.
-
0
-
0
-
0
-
0
-
0
-
0
