Алдана Троева Уус Алдан Бороҕонугар төрөөн, онно Мүрү 2-с №-дээх орто оскуолатын бүтэрэн, буҕаалтыр идэтин баһылаабыт. Улуус икки кытыы уонна уран тарбахтаахтар төрөөн-үөскээн ааспыт Чэриктэй, Түүлээх нэһилиэктэриттэн силистээх. Кини үс оҕо ийэтэ: Саяна, Андрианна, Максимилиан.
“Баардаах баара өтөн” дииллэринии, Алдана бастакы оҕотугар олорон иистэнэр буолбут. Тута сатаммыт эбит. Кэлин кыралаан сакаас ылар буолбут. Ол гынан баран, наһаа эппиэтинэстээҕин бэлиэтиир, ордук оҕо таҥаһа табыллар эбит. Оҕолоругар таҥастарын, маскарааттарын барытын бэйэтэ тигэр.
Алдана Васильевна лазернай станокка оҥоһуктары оҥоруон уруккаттан баҕарар эбит. “Баҕа санаа” диэн лиэксийэлэри истэн, ыра санаатын суруммут. Дьэ, ол баҕа санаатын олоҕун аргыһа Андрей Троев, кини дьарыгын, интэриэһин икки илиитинэн өйүүр буолан, 2020 сылга “Апачи Групп” диэнтэн лазернай станок сакаастаан, соһуччу бэлэх оҥорбут.
– Станогум кыамтата 3-тээх, 4-тээх фанераны быһар. Аан бастакыбар, омуммар диэххэ, билэ-билэбин соруйан, саамай уустуктан саҕалаабытым. Хас даҕаны дьапталҕалаах чаһыны уонна харысхалы оҥорбутум. Ойуутун көмпүүтэргэ анал бырагыраамаҕа уруһуйдуугун, биитэр бэлэм макыаттары булан туруоруоххун сөп.
Лазернай станокка үлэлииргэ саамай ыарахана оҥоһугун макыатын оҥоруу үһү. Сантымыатырыгар, миллимиэтиригэр тиийэ барытын сөпкө туруоруоххун наада. Атынын станок оҥорор, быһар. Ол кэнниттэн муннуктарын сымнатан, суус кумааҕынан аалаҕын.
Икки идэни баһылаабыт Алдананы сөҕөммүн, төрдүлэрин ыйыталастым. Ийэтинэн эбэтэ иистэнньэҥ, оттон абаҕата Нам улууһун колледжыгар уруһуйу үөрэтэр худуоһунньук эбит. Ол абаҕата Найахытааҕы дьиэтин күүлэтин эркиннэрин, ханан даҕаны кыра да сири хаалларбакка, барытын ойуулаабытын кэпсэтээччим ахтар.
Билигин Алдана Васильевна номнуо уопуттаах, нэһилиэнньэҕэ биллэр уус, онон тэрээһиннэр, бырааһынньыктар, бэлиэ күннэр чугаһаатылар да, киниэхэ элбэх сакаас киирэр.
– Дьон массыына харысхалын, органайзеры, халандаары, чаһыны ордук сакаастыыллар. Кэнники кэмҥэ уруу илдьитэ, фоторамка сакааска киирэр буолла, – оҥоһуктарын көрдө-көрдөрө кэпсиир.
Сакаас элбиир кэмигэр утуйары да умнан туран үлэлиир. Оҥоһуктарын чочуйуу өттүгэр кэргэнэ, оҕолоро көмөлөһөллөр эбит. Бэйэтин дьыалатыгар -- иистэнэргэ даҕаны, уһанарга даҕаны -- оҕолорун сыһыарара хайҕаллаах. Өссө биһирээбитим диэн, Аладана сорох дьон курдук кистээн буолбакка, бэйэ дьарыктаахтар кэккэлэригэр киирэн, судаарыстыбаҕа нолуок төлүү олорор эбит.
Сакаасчыттара уус алданнар эрэ буолбатах. Майаттан, Сунтаартан, Бүлүүттэн, Дьокуускайтан тиийэ үлэһэн оҥоттороллор эбит. Инникитин уһанар сирин кэҥэтэр былааннаах, итиэннэ станокка эрэ буолбакка, эт илиитинэн улахан уһаныыга холонор санаалаах.
Баҕалаах баҕанаҕа ыттар, Алдана Троева тарбаҕар да талааннаах, көрөн мээрэйдиир да дьоҕура сайдыбыт, онон уһанарга туттар сэп-сэбиргэл дэлэй үйэтигэр уус идэтин баһылыа дии саныыбын.
Айаал МОЛОКОТИН
-
0
-
0
-
0
-
0
-
0
-
0
