Экэниэмикэ

«Дьахтар биисинэс түмсүүтэ – дьоҕус уонна орто урбаан сайдыытын күүһэ» стратегическай сиэссийэ аһыллыытыгар өрөспүүбүлүкэ вице-премьерэ Ольга Балабкина СӨ Бырабыыталыстыбата урбаанньыттары өйүүрүн туһунан кэпсээтэ, пандемия, хааччахтааһын кэмигэр биисинэстээх дьахталлар тэрилтэлэрин тутан хаалларбыттарыгар махтанна.

СӨ атыы-бырамыысыланнас палаататын бэрэсидьиэнэ Марина Богославская урбаанньыттары өйүүр бырагыраамалары сырдатта, дьиэ кэргэн урбааныгар эрэгийиэн иһигэр куонкурус ыытылларын, кыайыылаах гранынан өйөбүлү туһанарын эттэ. “Кэлиҥҥи сылларга дьиэ кэргэнинэн биисинэс күүскэ сайдан эрэр. Дойду үрдүнэн ыытыллар «Ситиһиилээх дьиэ кэргэн – ситиһиилээх Арассыыйа» форумҥа быйыл Саха Сириттэн 30 чааһынай тэрилтэ кыттыыны ылла”, -- диэтэ.

«РемиЛинг» инвестиционнай хампаанньа генеральнай дириэктэрэ, Гражданскай көҕүлээһиҥҥэ уонна бырайыакка дьахталлар түмсүүлэрин сойууһун бэрэссэдээтэлэ Инга Легасова дьиэ кэргэн урбаана дойду экэниэмикэтин тирэхтээх, уһун болдьохтоох биисинэс-модела буоларын бэлиэтээн туран, федеральнай сокуоҥҥа дьиэ кэргэн урбаанын туһунан өйдөбүл баар буолуохтааҕын, статуһу ыларга ирдэбиллэр чопчуланыахтаахтарын ыйда. Дьиэ кэргэн урбаанын өйүүр анал судаарыстыбаннай агентствоны тэрийии уолдьаспытын, кини салайар тэрилтэтэ чэпчэтиилээх араас кирэдьииттэри, судаарыстыбаннай өйөбүллэри киинниир кыахтааҕын, маны тэҥэ дьиэ кэргэн урбаанын биир сомоҕо тутар ассоциация баар буолуон баҕарарын эттэ.

Кыра куораттарга уонна нэһилиэктэргэ дьиэ кэргэн биисинэһэ нэһилиэнньэ дьарыктаах буоларыгар төһүү күүс буоларын урбаанньыт, Липецкэй куорат дьокутаата, «Наш Липецк» аһымал пуонда бэрэссэдээтэлэ Евдокия Бычкова бэлиэтээтэ.

СӨ Үлэҕэ уонна социальнай сайдыыга миниистирэ Елена Волкова социальнай өҥөлөрү оҥорор тэрилтэлэри арыйааччыларга судаарыстыба өттүттэн туох өйөбүл баарын быһаарда. СӨ бырамыысыланнаска миниистирэ Максим Терещенко 2022 сыллаахха Саха Сиригэр чэпчэки бырамыысыланнаска анал кластер арылларын этэн үөртэ.

Стратегическай сиэссийэ чэрчитинэн урбаанньыт дьахталлар уопуттарын кэпсээтилэр. Үөһээ Дьааҥы улууһун Хайыһардаах нэһилиэгиттэн төрүттээх, билигин Аммаҕа олорор Саргылаана Рожина алта оҕо амарах ийэтэ буолар.

30-тан тахса сыл мэдиссиинэ сиэстэрэтинэн үлэлээбит. Кэлин ХИФУ мединститутугар үөрэнэн, 2010 сыллаахха "Организация хосписной службы, бизнес-план и медико-экономические расчеты" диэн тиэмэҕэ дипломнай үлэтин көмүскээбит. Бу үлэтигэр олоҕуран, 2012 сыллаахха “Маҥан аанньаллар» патронажнай сулууспаны тэрийэн, урбаанньыт суолугар үктэммит. Сиэстэрэлэри үлэҕэ ылан, дьиэҕэ уонна балыыһаҕа сытар ыарыһахтары көрөр-истэр буолбуттар. 2016 сыллаахха өссө кэҥээн, 59 миэстэлээх “Аһымал” диэн пансионаты арыйбыт. Онно билигин 50 кыаммат кырдьаҕас уонна инбэлиит баар эбит. Бу дьонун сибиэһэй, экология өттүнэн ыраас аһынан аһатар туһуттан, аны, көтөрдөрү иитэр, мүөттээх ыҥырыа пасекатын тутар. Бу түргэнник ситэр салааны сайыннараары, 2020 сыллаахха дьиэ кэргэнинэн “Агростартапка” кыттан кыайбыттар уонна "Мэҥкэр" диэн бааһынай хаһаайыстыбаны тэрийбиттэр. Бу хайысхаларын кэргэнэ Тимофей Дмитриевич сүрүннүүр. Улахан уоллара маркетинг уонна реклама, иккис уол производственнай чаас, кыыстара дизайн уонна батарыы боппуруостарын быһаарар эбээһинэстээхтэр эбит.

РФ атыы-бырамыысыланнас палаатата сылын ахсын "Ситиһиилээх дьиэ кэргэн - ситиһиилээх Арассыыйа" диэн дьиэ кэргэн биисинэһин сайыннарыыга туһуламмыт форуму ыытар. Рожиннар кыттан, сүбэ-ама ылан, үөрүүлэрэ үгүс. Саха Сиригэр быйыл Дьиэ кэргэн урбаанын өйүүр киин аһылларын истэн, олус биһирээтэ. Саргылаана Афанасьевна мустубут дэлэгээттэргэ дьиэ кэргэн биисинэһин туһунан кэпсээтэ. “Бу дойду экэниэмикэтин оҥкула, үлэ миэстэтин таһаарыы ньымата. Ол да иһин аан дойдуга дьиэ кэргэнинэн урбаан тэрилтэлэрэ көлүөнэттэн көлүөнэҕэ бэриллэн, бренд буолан сырыттахтара. Сахабыт Сиригэр да сайдар кыахтаах”, -- диэтэ.