Спикердэр бэйэ бородууксуйатын хайдах батарыахха сөбүн, итиниэхэ тус бренд суолтатын туһунан кэпсээтилэр, маркетинг уонна угуйук өттүгэр араас сүбэ-ама биэрдилэр.
Быыстапканы СӨ Урбааҥҥа, атыыга-эргиэҥҥэ уонна туризмҥа миниистир бастакы солбуйааччыта Максим Карбушев, СӨ Атыыга-эргиэҥҥэ балаататын бэрисидьиэнэ Марина Богословская, «Сделано в Якутии» түмсүү толорооччу дириэктэрэ Ольга Григорьева арыйдылар.
Түөрт күн устата Дьокуускай куорат уонна 17 араас улуустар урбаанньыттара ыыһаммыт эти, балыгы, үрүҥ аһы, бэлимиэни, сир аһыттан оҥоһуллубут барыанньалары, мүөт арааһын, дьахтар киэргэлин, сылаас үтүлүктэри, унтууну, остуол оонньуутун о.д.а. табаары атыыга таһаардылар. Бэл диэтэр шампунь, баттах мааскатын, кондиционерын кытта оҥороллор эбит. Этэргэ дылы саха сатаабатаҕа суох.
Туустаах уонна ыыһаммыт балыгы, эти кэлбит дьоҥҥо быһан ылан амсаттылар, өссө кымыс кутан биэрдилэр. Бэлэм кыһыллыбыт тоҥ балыгы киилэтин 1500 солк., «Индигирка» салааты 1200 солк., ыыһаммыт балыгы 1000 солк., туустаах уомулу 300 солк. атыылаатылар. Ону таһынан, 700 солк. быраҥааттаттан, чыыртан, муксуунтан, уомултан оҥоһуллубут балык кэнсиэрбэтэ баар.
Ынах этиттэн оҥоһуллубут бэлимиэн 450 гр. - 320 солк., 500 гр. тиэптэл – 395 солк., кэтилиэт 380 солк. Киилэ аҥаардаах тушенка 450 солк., үүт 120 солк., кэпиир, йогурт 60 солк.
Бэс туорааҕыттан, чаагаттан оҥоһуллубут барыанньа, сироп, ностуой, кедр арыыта, саахара суох джем кыһын тымныыга итии чэйи кытта саамай битэмииннээх уонна туһалаах ас. Дьон арааһыттан хаһы даҕаны ылан хаһаанар. Барыанньаны саахарга, эбэтэр фруктозаҕа оҥороллор эбит.
Дьокуускайга баар «Sakha тирии марал» хампаанньа ынах тириититтэн эр киһи бартыбыалын, курун, дьахтар суумкатын, кумааһынньыктары, докумуону, саха быһаҕын угар хааны оҥорор. Оҥоһуктарыгар сакаасчыт баҕатынан лазернай гравировка, харысхал, тэрилтэ логотибын оҥорон биэрэллэр. Бородууксуйаларын хаачыстыбатын мэктиэлиир буолан, кэлин босхо өрөмүөннүүллэр, фурнитуратын уларыталлар. Күн бүгүн дьиҥнээх тирииттэн 135 араас көрүҥнээх табаары оҥорон таһаараллар.
Быыстапканы кэрийэ сылдьан мин урбаанньыттары кытта кэпсэттим.
Мария Попова, «Sakha тирии марал» хампаанньа бэрэстэбиитэлэ:
Бэйэбит мастарыскыайбытыгар хороҕор муостаах тириитэ рулоннарынан кэлэр, ону кырыйан, тигэн араас бородууксуйа оҥоробут. Биһиэхэ ежедневниктар, күлүүс угар хаа, пааспар обложката, араас аксессуар баар, ону Саҥа Дьылга бииргэ үлэлиир дьоҥҥутугар бэлэхтиэххитин сөп.
Хайдах баҕарар өҥнөөх суумканы оҥорорго сакаас ылабыт, тириитин, быһыытын-таһаатын бэйэҕит талаҕыт. Дьахтар суумката 3000-8000 солк., эр киһи бартыбыала 9000-16500 солк., санныҥ нөҥүө кэтэр суумка 4800 солк.
Дмитрий Аргунов, Нам улууһун Хатыҥ-Арыы нэһилиэгэр эти ыыһыыр урбаанньыт:
Сыахпыт Граф биэрэгэр баар, эти ыыһаан, бу сыл саҥатыгар атыыга таһаардыбыт. Бородууксуйабытын үксүн дьаарбаҥкаларга атыылыыбыт, маҕаһыыммытын Намҥа арыйаары сылдьабыт. Улууспут үбүлээн, термокамера ылбыппыт, Санкт-Петербург куоракка эт деликатеһын астыыр кууруска үөрэнэн кэлбиппит. «Намская» диэн бэйэбит ырысыаппытынан ыыһаммыт халбаһыны кыратын 300 солк. атыылыыбыт, ону таһынан, сыалаах, сыата суох эти, ойоҕоһу ыыһыыбыт, ол-бу эбиискэ бороһуок туттубаппыт, консервант эппэппит. Дьон биһирээтэ, утары атыылаһа тураллар, туох даҕаны хаалбат. Куоракка киирэ иликпит, бастаан Нам улууһун хааччыйар санаалаахпыт.
Дмитрий Сергеев, «Antuar» хампаанньа бэрэстэбиитэлэ:
Биһиги Дьокуускайга шампунь, гель, кондиционер, мааска оҥорон таһаарабыт. Саха Сиригэр үүнэр кытыан оттон уонна да атын эмтээх үүнээйиттэн бородууксуйабытын оҥоробут. 250 гр. шампунь 899 солк., араас акция тэрийэн ыытабыт, ити шампуну кытта кондиционер ылыаххытын сөп.
* * *
Дьүүллүүр сүбэ «Бизнес-экспо» быыстапкаҕа кыттыбыт урбаанньыттар бородууксуйаларын көрөн, сыаналаан баран араас хайысхаларынан бастыҥнары наҕараадалаата.
«Бастыҥ атыы» түһүмэххэ Булуҥ улууһуттан аска-үөлгэ «Хоту балык» тэрилтэлээх Алексей Птицын уонна табаар өттүгэр Таатта улууһуттан Сарыал Билюкин кыайдылар.
«Быыстапка истиэндэтин бастыҥ киэргэтии» түһүмэххэ аска-үөлгэ Сунтаар улууһуттан «Тирэх» кэпэрэтиип, дириэктэр Юлиан Барашков, табаарга Үөһээ Бүлүүттэн «Клевер» арт-студия салайааччыта Мичилийэ Иванова бастаатылар.
«Бастыҥ ассортимент» түһүмэххэ Булуҥ улууһуттан аска-үөлгэ «Хоту балык» тэрилтэлээх Алексей Птицын уонна табаар өттүгэр Дьокуускайтан «Sakha тирии марал» хампаанньаттан Алексей Федоров тэҥнээхтэрин булбатылар.
«Хампаанньаны бастыҥ билиһиннэрии» түһүмэххэ аска-үөлгэ Чурапчы мүөтүн оҥорор урбаанньыт Күннэй Тимофеева, табаарга Дьокуускайтан «Байдам-уус» талааннаах тарбахтаах маастара Александр Васильев кыайдылар.
«Бастыҥ саҥа бородууксуйа» түһүмэххэ аска-үөлгэ Сунтаар улууһуттан «Тускул» ХЭТ дириэктэрэ Сергей Еремеев, табаарга Дьокуускайтан «Плетенкино мастарыскыайа» хампаанньаттан Ньургуйаана Черноградская бастаатылар.
Ааптар хаартыскаҕа түһэриитэ
- 0
- 0
- 0
- 0
- 0
- 0