Сис кэмитиэт бэрэссэдээтэлэ Алексей Корнилов ааспыт сыл түмүктэрин таһаарда, итиэннэ урбаан эйгэтигэр киирэр саҥа уларыйыылары билиһиннэрдэ.
Кыраадыстаах утах атыытын хааччахтыырга туһуламмыт өрөспүүбүлүкэ сокуонугар кэккэ уларыйыылар киирдилэр. Кафе, уопсастыбаннай аһылык туочуката диэн сымыйанан сылтахтанан пиибэни төгүрүк суукка хото атыылыыр эбийиэктэри хонтуруоллуурга федеральнай былаас эбии боломуочуйаны биэрдэ. Таһыттан көрдөххө, кафе диэн суруктаах эрээри, түүннэри пиибэни, кыраадыстаах утаҕы атыылыыр сымыйа кафелар элбэхтэр.
«Сокуон этэринэн, бастакытынан, кыраадыстаах утах, пиибэ эрэстэрээҥҥэ, кафеҕа, буфекка ГОСТ ирдэбилин быһыытынан атыыга тахсыахтаах. Уопсастыбаннай аһылык туочукатыгар куукуна, меню, гардероб булгуччу баар буолуохтаах.
Иккиһинэн, элбэх кыбартыыралаах дьиэ олохтоохторун ууларын уйгуурдубат, чуумпу олохторун ыспат туһугар итирдэр утах кафеҕа, барга күнүс 14 ч. киэһэ 20 ч. диэри атыыланыахтаах. Бу сокуон кулун тутар 1 күнүттэн олоххо киириэхтээх.
Хас биирдии муниципалитет кыраадыстаах утаҕы атыылыыр эбийиэк дьиэттэн төһө тэйиччи турарын бэйэтэ быһаарар. Холобур, Дьокуускайга дьон олорор дьиэтиттэн 50 м. тэйиччи туруохтаах. Онон итирдэр утах атыыланар бириэмэтин маҕаһыыны кытта тэҥнээн биэрдибит», — диэн этэр Алексей Дмитриевич.
Кыраадыстаах утах атыыга тахсар бириэмэтин кэспит урбаанньыттар административнай эппиэтинэскэ тардыллыахтара, уонунан тыһыынча ыстараабы төлүөхтэрэ. Оттон федеральнай сокуон итирдэр утаҕы эрэстэрээҥҥэ хаһан баҕарар түүннэри атыылыыры көҥүллүүр эбит. Сымыйа кафелар эрэстэрээҥҥэ көспөттөрүн туһугар ГОСТ быһыытынан үлэлиииллэрин бэрэбиэркэлиэхтэрэ, ол эбэтэр, вестибюль, гардероб, итиэннэ ас эгэлгэтин атыылыыр меню баар буолуохтаах.
Бу боппуруостары дьүүллэһэргэ, кыраадыстаах утах атыытын хааччахтыыр федеральнай сокуон барылын иккис ааҕыыга ылынарга сис кэмитиэт бэрэссэдээтэлэ Алексей Корнилов Судаарыстыбаннай Дуума мунньаҕар кытынна.
Ил Түмэн уурааҕынан стационарнайа суох мобильнай атыы-эргиэн бэрээдэктэннэ, тонизирующай энергетическэй утаҕы сокуоннай саастарын ситэ илик оҕолорго атыылыыр бобулунна.
Василий Кононов хаартыскаҕа түһэриитэ.
-
2
-
0
-
0
-
0
-
0
-
0
