Сокуоҥҥа киирбит көннөрүү ис хоһоонун арыйан биэрдэххэ, идэлэринэн сакаас ылан үлэлиир дьон, ремесленниктэри өйүүргэ судаарыстыбаттан көмө оҥоһуллуохтаах. Федеральнай былаас эрэгийиэн ремесленниктэр испииһэктэрин бэйэтэ оҥороругар быраап биэрдэ.
«Ремесленник булгуччу урбаанньыт диэн эрэгэстэрээссийэлэнэрэ ирдэммэт, кини бэйэ дьарыктаах (самозанятай) буолуон сөп. Айылҕаттан тарбахтарыгар талба талааннаах, илиилэрин сылааһын иҥэрэн, киһини кэрэхсэтэр оҥоһуктары оҥорор дьон бааллар. Кинилэр хайаан даҕаны норуот национальнай уус-уран оҥоһуктарын эрэ оҥороллор диэн кыараҕастык өйдүүр сатаммат.
Судаарыстыбаттан көмө ылыахтаах ремесленниктэр дьону үлэҕэ ылан, хамнас төлөөн үлэлэппэттэр, бэйэлэрин оборудованиеларыгар бэйэлэрэ үлэлиир буолуохтаахтар. Холобур, саха быһаҕын оҥорор уустар, араас таҥаһы тигэр иистэнньэҥнэр, дьоҕус мастарыскыайга миэбэли, пластиковай түннүгү, иһити-хомуоһу оҥорооччулар о.д.а. киирэллэр. Кэлиҥҥи кэмҥэ оһоҕу оҥорооччу идэтэ умнуллан, аҕыйаан иһэр. Дьиҥэр, тыа сиригэр оһоҕунан дьиэлэрин сылытан олорор ыал элбэх, оһохторун өрөмүөннүүргэ идэлээх киһиэхэ наадыйаллар эрээри, булаллара уустугурда. Маннык дьон идэлэрин бырахпаттарын туһугар болҕомтобутун ууруохтаахпыт», — диэн этэр Ил Түмэн урбааҥҥа уонна туризмҥа сис кэмитиэтин бэрэссэдээтэлэ Алексей Корнилов.
Быйыл сыл бастакы аҥаарыгар ремесленниктэр испииһэктэрин бигэргэтиэхтээхтэр. Бэйэ дьарыктаах дьон бастайааннай үлэлэриттэн уурайан, социальнай хааччыллыыттан аккаастанан көҥүл барарга бэлэмэ суохтар эрээри, итинник айылҕаттан бэриллибит дьоҕурдарынан эбии дохуот оҥостоллор. Кинилэр уопсастыбаҕа туһаны оҥорор үлэлэрин сайыннаралларыгар судаарыстыбаттан көмө оҥоһуллуохтаах, холобур, мастарыскыай арыйарга судаарыстыбаннай бас билиигэ баар дьиэни-уоту куортамҥа чэпчэтиллибит сыананан булан биэриэхтэрэ. Ону таһынан, оборудование атыылаһалларыгар көмөлөһүөхтэрэ.
Урбаанньыттар биир кыһалҕалаах боппуруостарынан страховой усунуоһу төлүүллэр эрээри, биэнсийэ алын кээмэйин ылаллар. Судаарыстыба урбаанньыт үбү-харчыны эргитэн биэнсийэтин бэйэтэ хааччыныахтаах диэн өйдөбүллээх. Күн бүгүн сорох идэлэринэн дохуот олох намыһах буолан, дьон дьиэ кэргэттэрин кыайан иитэр кыахтара суоҕуттан, кыһалҕаттан атын үлэҕэ бараллар. Дьиҥэр, киһи тугу сатыырынан, сүрэҕэ сөбүлүүрүнэн дьарыктаныахтаах, онно сөптөөх усулуобуйа тэриллиэхтээх.
Хаартыска: Мария Васильева, СИА.
-
1
-
0
-
0
-
0
-
0
-
1
