Чурапчы улууһугар Герман тэрийэн үлэлэтэр “Харысхан Мебель” тэрилтэтэ 2020 сыллаахтан үлэлиир. Кини дьон баҕатын учуоттаан, кинилэр тус эскиистэринэн уонна кээмэйдэринэн мас араас көрүҥүттэн киһи эрэ кэрэхсиир, бэрт хаачыстыбалаах миэбэл арааһын оҥорор. Герман Белолюбскай соторутааҕыта саҥа саҕалааччы урбаанньыттарга анаммыт Чурапчы улууһун баһылыгын гранын кыайыылааҕа буолбут.
– Мин биисинэспин түөрт сыллааҕыта саҕалаабытым. Оҕо эрдэхпиттэн маска сыстаҕаспын, маһынан уһанарбын ордоробун. Онуоха эһэм Матвей Гаврильевич Белолюбскай өҥөтө, такайыыта сабыдыаллаабыта. Кини, чахчы, көмүс тарбахтаах мас ууһа этэ. Эһэм уһанарын көрөн, бастакы оҥоһуктарбын “төрөппүппүн” бу баардыы өйдүүбүн. Онтон дууһам сытар, дуоһуйууну ылар сөбүлүүр дьарыкпын үлэ гынан, урбаанньыт буоларга санаммытым.
Герман бастаан утаа бэйэ дьыалатын саҕалыырыгар уустуктары көрсүбүт. Сөп түбэһэр мастарыскыайа суох, аны, куортамнаһан ылыаҕын, сөптөөх дьиэ-уот, тэрил, үп да көстүбэтэх. Онуоха кини уустуктан тахсар суолу тобулбут – эргэ дьиэтин күүлэтин ичигэс гына оҥорон, бэйэтигэр сөп түбэһэр мастарыскыайга кубулуппут. Ол эрээри, эргэ-эргэ курдук, киһи санаатын табан, үөрэ-көтө үлэлиири хааччыйбатах – кыараҕас, ону ааһан, тымныы буолан биэрбит.
Ол эрээри, ылсыбытын ыһыктыбат эдэр урбаанньыт онтон санаатын түһэрбэккэ, хас биирдии сакааһыттан киирбит үбү-харчыны ордорон-мунньан, сөптөөх үстүрүмүөннэри атыылаһан барбыт. Сыл буолан баран, сабыс-саҥа дьиэни туттубут, оттон олорбут дьиэтин санаата сытарынан мастарыскыайга кубулуппут. Оччолортон улахан сакааһы ыларга туһааннаах үстүрүмүөнүнэн, тэрилинэн толору хааччыллыбыт. Бастакы килийиэннэринэн аймах-билэ дьоно, доҕотторо буолбуттар. Оҥорон таһаарыыны саҕалыырга, Герман этэринэн, сүрүн оруолу үчүгэй угуйук уонна киһи аата-суола (репутация) ылар эбит.
– Мин санаабар, барыта киһиттэн бэйэтиттэн тутулуктаах. Мин оҕо эрдэхпиттэн муспут үөрүйэҕим, сатабылым көмөлөһөллөр. Хас биирдии сорудаҕы хаачыстыбалаахтык уонна эппиэтинэстээхтик толорорго, үлэҕэ-хамнаска кырабыттан үөрэппиттэрэ. Билигин миэхэ тапталлаах кэргэним күүс-көмө, сүбэ-ама буолан, улаханнык өйүүр, абырыыр. Мин киниэхэ махталым муҥура суох. Аттыгар эйигин өйүүр киһи баар буоллаҕына, тугу барытын кыайарга кынаттанар эбиккин, – диэн эдэр урбаанньыт ситиһиитин кистэлэҥин арыйар.
2022 сыллаахха Герман Чурапчытааҕы Нэһилиэнньэ социальнай харалтатын управлениетын кытары социальнай хантараагы түһэрсибит. Хантараак үбүнэн анал ыстаныактары атыыласпыт. Онтон ыла оҥорор миэбэллэрин хаачыстыбата көрбүтүнэн тупсубут, сакаасчыттар кэтэһэр болдьохторо биллэ аччаабыт.
2023 сыллаахха урбаанньыт анал хамыыһыйаны ааһан, улуус баһылыгын гранын кыайыылаахтарыттан биирдэстэрэ буолбут. Баһылык гранын харчытынан анал бырагырааманан салайыллар лазернай фрезерно-гравировальнай ыстаныагы уонна миэбэл сыаҕын үлэһиттэригэр тиийбэт үстүрүмүөннэри ылбыт.
– Сыаллаахпыт, соруктаахпыт уонна ону хайдах ситиһэри, олоххо киллэрэри билэбит. Инньэ гынан, дьыалабыт-былааммыт барыта табыллыа диэн бүк эрэнэбин. Биисинэскэ кэмчилиир, кэччэнэр сыыһа! Аска, таҥаска өссө харчыны кэмчилиэххэ сөп, оттон биисинэскэ – суох. Биисинэһиҥ атаҕар турдаҕына, дьэ, талбыккынан аһыыр, таҥнар буоллаҕыҥ. Мин биисинэһим – мин төрөппүт оҕом! – диэн Герман санаатын үллэстэр.
Дмитрий ИВАНОВ.
-
0
-
0
-
0
-
0
-
0
-
0
