Ил Түмэн тутууга, олох-дьаһах хомунаалынай хаһаайыстыбаҕа уонна энэргиэтикэҕэ сис кэмитиэтин бэрэссэдээтэлэ Александр Корякин бэлиэтииринэн, билигин ОДьКХ баар кыһалҕалары быһаарыахха наада. Саха Сирин парламена онуохаҕа туһуланар үлэни ыытар, миэрэлэри ылынар, сокуоннары ситэрэн-хоторон биэриигэ былааннаах үлэни көҕүлүүр.
«Ыытар үлэбит түмүктэрин билиһиннэрдэххэ, хомунаалынай комплекс тэрилтэлэрин субсидиялааһыны улаатыытын тохтоторго үлэ, дьайыы былаана оҥоһуллан, бигэргэнэн турар. Бүддьүөккэ улахан ноҕурууска үөскээбитинэн маннык хардыы оҥоһуллара наада этэ. Бүддьүөтү корректировкалааһын кэмигэр ханна, хайдах уустуктар баалларын, ханна ордук болҕомтону уурары бары да сөптөөхтүк өйдөөн, ону быһаарарга үлэлэһэбит, ситимнээх хайысханы тутуһабыт», - диэн кэмитиэт салайааччыта кыһалҕаны быһаарыыга туох-ханнык үлэ ыытылларын билиһиннэрэр.
Ол курдук, 2020 сылтан 2025 сылга диэри ОДьКХ тэрилтэлэрин тарыыптарын сыаналарын араастаһыытын төлөөһүҥҥэ уопсай ороскуот кээмэйэ икки төгүл улаатта. Сүрүн биричиинэтэ - уматык-энэргиэтикэ ресурсаларын сыаната үрдээһинэ. Холобура, миэрэ ылыллыбатаҕына, 2030 сылга диэри субсидия кээмэйэ 63, 8 млрд. солк. тиийэ үллэ улаатыан сөп.
Балаһыанньаны көннөрөргө Саха Өрөспүүбүлүкэтин Ил Дарханын сорудаҕынан биэдэмистибэлэр икки ардыларынааҕы үлэлиир бөлөх тэриллибитэ уонна 7 сүрүн хайысханан 45 тэрээһини ыытар туһунан былааны оҥордо.
Бу 45 тэрээһини олоххо киллэрии түмүгэр, 23,7 млрд. солк. капитальнай ууруу үбэ үлэлээн 2025-2030 сс. диэри 50,5 млрд. солк. көдьүүһү оҥоруохтаах. Оттон 2035 с. бу тэрээһиннэр уопсайынан 129,6 млрд. солк. көдьүүһү биэриэхтээхтэр.
Санатар буоллахха, Ил Дархан Айсен Николаев Ил Түмэҥҥэ бэйэтин Анал этиитигэр хомунаалынай хаһаайыстыба тэрилтэлэригэр чопчу соруктары туруорбута: 2028 сылга диэри субсидиялааһын 2024 сыллааҕы көрдөрүү сууматыттан ордуга суох буолуохтаах, оттон 2030 сылга - бу кээмэйи ол кэминээҕи сыанаҕа таһаардахха 10 % кырата суох аччатыаллыахтаах. Бу хаалбыт үбү-харчыны приоритетнай социальнай бырайыактарга ыытарга кыах биэриэҕэ.
Бырабыыталыстыба чааһа сарсыарда 10 чаастан саҕаланыаҕа. Саха Өрөспүүбүлүкэтин сыана бэлиитикэтигэр судаарыстыбаннай кэмитиэтин бэрэссэдээтэлэ Николай Бочков уонна Саха Өрөспүүбүлүкэтин олох-дьаһах хомунаалынай хаһаайыстыбаҕа уонна энэргиэтикэҕэ миниистирэ Вячеслав Емельянов иһитиннэрии оҥоруохтара.
Хаартыска Ил Түмэн пресс-сулууспата
-
0
-
0
-
0
-
0
-
0
-
0
