Экэниэмикэ

Атыттар бааннар олохтообут ыстаапкаларынан кирэдьииттэрин төлүүллэр. Ипэтиэкэ бырыһыана эмискэ үрдээн, оччотугар дьиэ сыаната чэпчиэ диэн сорох дьон ээр-сэмээр күүтэ-кэтэһэ сатаатылар даҕаны, сыана, хомойуох иһин, түспэтэ. Ыраата барбакка 4-5 сыллааҕыта саҥа тутулла турар дьиэҕэ биир хостоох кыбартыыра 2,5-3,5 мөл. солк. этэ, билигин 6,5-7,5 мөл. солк. чэпчэкини булбаккын. Ити аҥаардас бетонунан көрөн турар эркини өссө өрөмүөннүөххүн, сантехникатын тардыаххын наада.

Сыана тоҕо түспэтэ биллэр, дьон харчылаах, атыылаһар кыахтаах, хас да мөлүйүөнү укта сылдьаллар, ол иһин тутааччылар, атыыһыттар сыаналарын түһэрбэттэр. Өскөтүн ким да атыыласпакка дьиэ-уот ырыынага туран хаалбыта буоллар, сыаналарын түһэрэн барыа этилэр. Ол эрэн оннук буолбата. Саастарынан хапсыбат, кыра оҕото суох, быраас-учуутал ахсааныгар киирбэт нэһилиэнньэ араҥата дьиэ атыылаһар кыахтан маттылар.    

Чэмэлиинэ Кюндяйцева Дьокуускайдааҕы дьиэ-уот пуондатын ипэтиэкэ өрөспүүбүлүкэтээҕи хампаанньатын эдэр үлэһитэ риэлторынан үлэлээбитэ быйыл номнуо ахсыс сылыгар барда. Кини дьон эргэ кыбартыыраларын атыылыыллар, харчыларын мунньуналлар уонна сөбүлүүр дьиэлэрин атыылаһаллар диэн быһаарар.

«Санаан да көрдөххө, дьон дьиэлэрин 8 мөл. солк. атыылыы олорон хайдах 6 мөл. солк. туран биэриэхтэрэй. Ити үпкэ уонна тугу ылаллар? Түһэрдэхтэринэ даҕаны 200-100 тыһ. солк. түһэрэллэр.

Биллэрии таҕыстаҕына, биллэн турар, урукку сыллары кытта тэҥнээтэххэ, дьиэ тута түргэнник атыыламмат эрээри, дьиэ сыанатын улахан аҥаарын уу харчынан ууран биэрэр да ыаллар бааллар. Кинилэр тиийбэтэҕинэ бэрт кыра харчыны ипэтиэкэнэн ылаллар, ол дохуоттарыгар охсубат.

Билигин дьиэни атыылыыбын диэн биллэрии быдан аҕыйаата. Үгүстэр хаһан уларыйыы тахсарын күүтэллэр, эбэтэр дьиэлэрин куортамныыллар. Куортам сыаната эмиэ олус ыараата, куорат киинигэр 1 хостооҕу 50 000 солк. куортамҥа биэрэллэр, студияны 45 000 солк.», — диэн Чэмэлиинэ дьиэ-уот ырыынагар бүгүҥҥү балаһыанньа туһунан кэпсиир.

Хаартыска ааптар түһэриитэ + Чэмэлиинэ Кюндяйцева архыыбыттан.