Өлүөхүмэ куораттан нефтекотельнай оттугу ГУП ЖКХ-аҕа тиэйэллэр. От ыйын бүтүүтэ 11,5 тыһыынча туоннаны, онтон 2,3 тыһыынча туоннаны Аартыка улуустарыгар тиэйбиттэрэ.
ГУП ЖКХ тэрилтэ туттарыгар Кыһыл Сыыртан гаас конденсаата Сангаарга депонацияҕа тиэрдилиннэ. Онтон мунньуллубут оттук танкердарынан Анаабыр уонна Өлөөн өрүстэринэн хоту тиэрдиллиэҕэ.
Осетрово пуорка уонна Дьэбэрики Хайа бөһүөлэккэ таас чоҕу тиэйэн Яна өрүһүнэн айанныахтара. Аллараа Бэстээх таһаҕаһы тиэйэр терминалыттан Яна өрүһүнэн табаары тиэммит «Капитан Орлов» теплоход устуоҕа.
Яна уонна Халыма өрүстэринэн муора суолунан 100 тыһыынча туонна ньиэп бородууксуйатын уонна 27 тыһыынча туонна кураанах таһаҕаһы тиэйиэхтэрэ. Яна, Индигирка, Халыма өрүстэргэ өрүс-муора суолунан сылдьар улахан суудуналар таһаҕаһы тиэрдиэхтэрэ.
«Аартыка навигацията олус кылгас болдьохтоох, от ыйын 20 күнүгэр саҕаланар уонна балаҕан ыйын 13 күнүгэр түмүктэнэр. 70 күн иһигэр биһиги киирбит сайаапканы, түһэрсиллибит дуогабары барытын толоруохтаахпыт. Өрүскэ уонна муораҕа сылдьар суудуналар сылга баара-суоҕа 70 эрэ күн үлэлииллэр, онтон атын кэмҥэ кинилэр үлэлиир кыахтарын хааччыйабыт.
Таһаҕаһы тиэйэргэ флот кыамтата, табаары сүөкүүр тиэхиньикэ күн бүгүн тиийэр, ол эрэн хоту табаары тиэйии сыл ахсын эбиллэн иһэр, ону эмиэ учуоттуохха наада», — диэн этэр Сергей Ларионов.
Хаартыска Сергей Ларионов Телеграм-ханаалыттан.
-
0
-
0
-
0
-
0
-
0
-
0
