— Бырабыыталыстыба бэрэссэдээтэлэ Михаил Владимирович Мишустин салайар стратегическай сиэссийэтигэр докумуон көрүллүөн иннинэ, кэлим бырайыак хас биирдии чааһыгар үбү-харчыны хантан ылары быһаарыахха уонна эппиэтинэстээх толорооччу уорганнары аныахха наада. Докумуону оҥоруу үлэтэ салҕанан барарын уонна чопчу түмүгү ситиһэргэ көрдөһөбүн. Тустаах толорооччу уорганнар уонна федеральнай былааннар бары эппиэтинэстээх буолуохтаахтар, — диэн Трутнев сорудахтаата.
АЗРФ уонна ТТК сайдыытыгар сыһыаннаах боппуруостар 2026 сыл бэс ыйыгар Михаил Мишустин салайар стратегическай сиэссийэтигэр дьүүллэһиллиэхтэрэ диэн иһитиннэрдэ.
Трансарктическай тырааныспар көрүдүөрүн хааччыйыы инфраструктуратын сайыннарыы чэрчитинэн, уу суолларын, муора пуортарын сайыннарыы, суоллары уонна тимир суоллары тутуу, саҥардыы былааннара дьүүллэһилиннилэр. Итиэннэ Юрий Трутнев Арассыыйа Тырааныспарга министиэристибэтигэр, Экономическай сайдыыга министиэристибэтигэр, Уһук Илини сайыннарыыга министиэристибэтигэр уу суолунан таһаҕаһы таһыыга ырытыыны бэлэмнииргэ уонна ону сайыннарар былааннары киллэрэргэ сорудахтаата.
Судаарыстыбаннай хамыыһыйа мунньаҕар РФ Аартыка эҥээригэр уонна Уһук Илиҥҥи федеральнай уокурукка муора пуортарын сайыннарыы туһунан кэпсэттилэр.
БАМ тимир суолун саҥардыы үһүс түһүмэҕин чэрчитинэн, түөрт сүрүн тутууга үлэ бара турар: 2-с Северомуйскай, 2-с Кодарскай, 2-с Кузнецовскай тоннелларга уонна Амур өрүһү туоруур муостаҕа. Быйыл Мурманскай тырааныспар түмүгэр (Мурманскай-Волховстрой учаастак) ыраахтан чугаһыыр суоллары бөҕөргөтүү түмүктэниэҕэ. Сковородино-Рейново тимир суол лиинийэтин, Дьэлиҥдэ-Мохе тутуу бырайыагын бастакы түһүмэҕин тутуутугар үлэ салҕанар. Тимир суоллары таһынан, массыына суолларын инфраструктурата эмиэ сайдар. Бу үлэ 2035 сылга диэри Аартыка зонатыгар сүрүн нэһилиэнньэлээх пууннары сайыннарыы чэрчитинэн ыытыллар, онно трассалары сайыннарыыга 30 миэрэ киирэр.
Арассыыйа бэрэсидьиэнэ Владимир Путин өйөбүлүнэн, ол иһигэр «Көдьүүстээх тырааныспар систиэмэтэ» национальнай бырайыак көмөтүнэн, Уһук Илин 25 аэродромун, Сибииргэ 12 аэропорду, Аартыка зонатыгар 6 аэродрому саҥардыы ыытыллар.
«Сыанабыл быһыытынан, Аартыка Арассыыйа баалабай бородууксуйатын 7 бырыһыанын уонна экспорт 11 бырыһыанын ылар. Ону кытта эрэгийиэн салгыы кэлим сайдыытыгар улахан кэскили көрөбүт. Саамай сүрүн хайысханан Аартыка тырааныспарын уонна логистикатын ситимин бөҕөргөтүү буолар», — диэн Владимир Путин бэлиэтээн турар.
Саха Сирэ Арассыыйаҕа саамай улахан Аартыкатааҕы эрэгийиэн быһыытынан биллэр. Саха Сиригэр Аартыка 1,6 мөл. кв.м. иэннээх, ол өрөспүүбүлүкэ иэнин 52%-нын ылар. 13 муниципальнай оройуон РФ Аартыка эҥээригэр киирэр. Өрөспүүбүлүкэ Аартыка сирин-уотун социальнай-экэнэмиичэскэй сайыннарыы стратегиятын ылыммыта.
Анал судаарыстыбаннай бырагыраама олоххо киирэн, Аартыка улуустара эмиэ үгүс салааҕа аналлаах судаарыстыбаннай бырагыраамаларга киирэллэр. Кинилэри олоххо киллэриини анал тэриллибит ааҕыныстыба, Аартыка уонна Хотугу норуоттар дьыалаларыгар министиэристибэ сүрүннүүллэр. Бу докумуоннар чэрчилэринэн уонунан бырайыак олоххо киирэн эрэр, олортон хас даҕаны бырайыак федеральнай билиниини ылбыта.
«2026 сылга Саха Сиригэр «Росатом Арктика» диэн биир кэлим муора операторын үлэҕэ киллэрии былааннанар. Муора тырааныспарын кэҥэтии, элбэтии Аартыканы хааччыйыыга улахан суолталаах хардыы буолуоҕа. Хотугу таһаҕаһы тиэйиини салайарга тырааныспар логистикатын сайыннарыы ордук суолталаах. Билигин тиэйии ороскуота чох сыанатын 45% ылар, оттон Аартыкаҕа тиэрдиллибит түгэнигэр 77%», – диэн Ил Дархан Айсен Николаев Ил Түмэҥҥэ туһаайан этиитигэр бэлиэтээбитэ.
Хаартыска: ГТРК «Вести-Саха»
-
0
-
0
-
0
-
0
-
0
-
0
