“2019-2024 сс. Бүлүү бөлөх улуустарын уунан хааччыйыы тиһигин сайыннарыы” бырагырааманы олоххо киллэрии сүнньүнэн Үүнэр көлүөнэ пуондата Сунтаар улууһун Уустуйа сэлиэнньэтигэр уу таһар техника атыылаһар туһунан биллэрбит.
Санатар буоллахха, Ил Дархан Айсен Николаев анал этиитигэр туруорбут соруктарын толорорго “Кэскилбит туһугар” тус сыаллаах бырагыраамаҕа Бүлүү бөлөх улуустарын ыраас уунан хааччыйыы үлэтэ киллэриллибит. Бу соругунан СӨ бырабыыталыстыбата “2019-2024 сс. Бүлүү бөлөх улуустарын уунан хааччыйыы тиһигин сайыннарыы” бырагыраама оҥорбут. Бырагыраама Үүнэр көлүөнэ пуондтыттан сылын аайы 150 мөл. солкуобайынан үбүлэнэр уонна “АЛРОСА” АК бу үлэҕэ үбүн көрүөхтээх.
Бырагырааманы олоххо киллэрэн ууну ыраастыыр станциялары тутуу, саҥалыы уларытан оҥоруу, скважиналары хаһыы, иһэргэ сөптөөх сир аннынааҕы ууну көрдөөһүн үлэлэрэ ыытыллаллар. Быйыл Сунтаар улууһун Ыгыатта сэлиэнньэтигэр бытыылкалаах ууну кутуу оборудованиета ылыллар. Бүлүү бөлөх улууһун нэһилиэнньэлээх пууннарыгар уу таһар 10 техника атыылаһыллыбыт.
- 0
- 0
- 0
- 0
- 0
- 0