Ол курдук, ойуур баһаардара 14 улуус сиригэр бэлиэтэнэллэр: Хаҥаласка (1), Ньурбаҕа (4), Сунтаарга (4), Ленскэйгэ (1), Үөһээ Бүлүүгэ (4), Томпоҕо (2), Уус Майдаҕа (1), Кэбээйигэ (1), Тааттаҕа (1), Өлүөхүмэҕэ (2), Өймөкөөҥҥө (1), Дьокуускайга (1), Бүлүүгэ (1), Мэҥэ Хаҥаласка (1).
Бу 25 ойуур баһаарыттан уопсайа 13 922,3 га иэннээх биэс ойуур баһаарын хаайбыттар: Ньурбаҕа (1), Сунтаарга (1), Хаҥаласка (1), Тааттаҕа (1), Мэҥэ Хаҥаласка (1). Уоту утары уопсайа 1340 киһи уонна 131 тиэхиньикэ үлэлии сылдьаллар.
Ааспыт суукка устата түөрт ойуур баһаарын хам баттаабыттар. Ол гынан баран, үөһэттэн кэтээн көрүүнэн, Саха сиригэр 31 термо-туочука баара баара бэлиэтэнэр.
Минэкология ойуур кэтэбилигэр уонна харыстабылыгар департаменын салайааччыта Владимир Иванов куйаас күннэргэ ойуур баһаардара өссө эбилиннилэр диэн бэлиэтээтэ.
– Бэс ыйын 19 күнүттэн 21 күнүгэр диэри өрөспүүбүлүкэ иһигэр уопсайа 14 ойуур баһаарын умуллардылар. 356 га иэннээх сир уоттан босхолонно. Билигин 14 сөмөлүөтүнэн баһаар балаһыанньатын кэтээн көрөбүт. Күн бүгүн Авиалесохрана 196 үлэһитэ, Приморье авиационнай базатын 120 үлэһитэ, Уһук Илиҥҥи ойуур харыстабылын авиационнай базатын 53 үлэһитэ баһаардары утары охсуһа сылдьаллар, – диэн Владимир Иванов иһитиннэрдэ.
Билиҥҥитэ ыксаллаах быһыы-майгы балаһыанньата биэс улууска биллэриллэн турар: Ньурбаҕа, Томпоҕо, Үөһээ Бүлүүгэ, Сунтаарга уонна Өймөкөөҥҥө.
-
0
-
0
-
0
-
0
-
0
-
0
