“Рослесзащита” федеральнай хааһына тэрилтэтин чинчийиилэрин түмүгүнэн, Нам, Хаҥалас уонна Дьокуускай тыаларыгар, уопсайа 204 440,4 га иэннээх сиргэ, солко өрөөччүнү булгуччу эмтиир туһунан быһаарыныы ылыныллыбыт.
Маны таһынан, ыам ыйын 27 күнүнээҕи Саха Өрөспүүбүлүкэтин ыксаллаах быһыыга-майгыга уонна баһаарынай өттүнэн көмүскэллээх буолууга хамыыһыйатын боротокуолунан Нам, Хаҥалас уонна Дьокуускай тыаларыгар ыксаллаах быһыы-майгы балаһыанньатын биллэрэллэрин туһунан дьаһал тахсыбыт.
Солко өрөөччүнү сөмөлүөтүнэн химичэскэй бэссэстибэлэри үөһэттэн кутан эмтииллэр. Манна “Клонрин” диэн үөн иһигэр киирэн сүүһүрдэн өлөрөр эмп туттуллар. Бу препарат дьоҥҥо уонна дьиэ сүөһүтүгэр буортута суох.
Минэкология ойуур кэтэбилигэр уонна харыстабылыгар департаменын ыстаарсай иниспиэктэрин Николай Никитин дааннайынан, билиҥҥитэ 11 312 га, ол эбэтэр уопсай иэнтэн 5,53 % эмтэммит. Былааннаммыт үлэлэр от ыйын саҥатыгар бүтүөхтээхтэр.
Санаттахха, Саха сирин экологияҕа министиэристибэтэ эрдэ солко өрөөччүнү эмтээһиҥҥэ аукцион ыыппыта. Онно “Рослесзащита” федеральнай тэрилтэ кыайбыта. Хантараак суумата 4 030 608 солк. тэҥнэһэр.
-
0
-
0
-
0
-
0
-
0
-
0
