Баһаар куттала үөскүүр кэмэ биллэриллиэҕиттэн «Өлүөнэ очуостара» паарка сиригэр уопсайа 11 ойуур баһаара бэлиэтэммит. Ол онтон 7 баһаара умуруоруллубут. Аркадий Семенов бэлиэтээбитинэн, от ыйын 18 күнүнээҕи туругунан 23350 га сиринэн тэнийбит ойуур 4 баһаара паарка сиригэр умайар. Ол онтон от ыйын 19 күнүгэр 3 баһаарын бохсубуттар.
Норуот дьокутаата иһитиннэрбитинэн, национальнай пааркаҕа турбут баһаары умуруорууга 212 киһи үлэлиир: 22 паарка үлэһитэ, Авиалесохрана 159 парашютист-десантнига, 2 көтөр аал лүөччүгэ уонна 29 олохтоох дьон.
«Баһаары умулларыыга сылдьар дьон түүннэри-күнүстэри үлэлииллэр. Манна тиэхиньикэни сатаан аҕалар кыахпыт суоҕунан, дьон уоту кытта кыһыл илиилэринэн охсуһаллар. Маны таһынан уу тиийбэтэ атахтыыр. Үксүгэр уот хайа эниэтигэр тиийэр, ол иһин бөртүөлүөтүнэн да ууну онно тиэрдэр уустуктаах. Ол иһин тыал хайысхата сөп түбэстэҕинэ, утары уот ыытабыт. Билиҥҥи туругунан турбут баһаары кытары охсуһууга бу саамай көдьүүстээх ньыманан буолар», -- диэн Аркадий Семенов социальнай ситим сирэйигэр суруйбут.
-
0
-
0
-
0
-
0
-
0
-
0
