Ньурба аэропордун көтөр-түһэр балаһатын кытаанах бүрүөһүнүн саҥардыахтаахтар. Онон көрсүһүүгэ бу үлэҕэ кыттар генеральнай бэдэрээтчит уонна хос бэдэрээтчиттэр тустарынан кэпсэтии барда. Улуус салалтата аэропорду саҥардыыга суол хаһаайыстыбатыгар үлэлиир олохтоох урбаанньыттар кытталларын туруоруста.
Сакаасчыт быһыытынан “Аэропорты Севера” тэрилтэ Ньурба улууһун салалтатын позициятын өйөөтө. Көрсүһүү кэмигэр Вадим Волков нэдиэлэ аайы сэрэдэҕэ улуус салалтатын кытта Ньурба аэропордун саҥардыытыгар туһуламмыт анал мунньахтары ыытар буолуохпут диэн эттэ.
“Мин санаабар, олохтоох урбаанньыттар бу бөдөҥ федеральнай бырайыакка эмиэ үлэлиэхтэрин наада”, – диэн улуус баһылыга Алексей Иннокентьев эттэ.
– Ньурба урбаанньыттара “Бүлүү” федеральнай суолун тутуутугар, Марха өрүһү уонна Түүкээн үрэҕин туоруур муосталарга көхтөөхтүк үлэлэспиттэрэ. Онон улахан бырайыакка үлэлии сүҥкэн уопуттаахтар. Улууска улахан кыамталаах бульдозердар, самосваллар, экскаватордар элбэхтэр. Итинэн сиэттэрэн, Ньурба улууһун урбаанньыттарын бу баараҕай бырайыакка кытыннараргытыгар этиилээхпит, – диэн Алексей Михайлович туруоруста.
Көрсүһүү кэмигэр суолга үлэлиир олохтоох урбаанньыттар федеральнай тэрилтэ салалтатын кытта үлэ-хамнас боппурустарынан эмиэ кэпсэттилэр.
Ньурба улууһун дьаһалтатын пресс-сулууспатын матырыйаалынан.
-
0
-
0
-
0
-
0
-
0
-
0
