Дмитрий Викторович Саха Өрөспүүбүлүкэтин Бырабыыталыстыбата Өлүөнэ муостатын тутуутун дирекциятын тэрийэрин туһунан дьаһала тахсыбытын иһитиннэрдэ. Билиҥҥитэ дирекцияны регистрациялааһын, устаабын бигэргэтии уо.д.а. юридическэй хабааннаах үлэлэр бара туралларын кэпсээтэ.
“Ити олус суолталаах дьаһал. Тоҕо диэтэххэ, бырайыагынан анал идэлээх испэсэлиистэр дьарыктаныахтаахтар. Быһаарыныылары бүтүннүү биир киин ылыныахтаах уонна сүрүннүөхтээх. Араас министиэристибэлэр уонна тэрилтэлэр бэйэ бэйэлэригэр сэлээннэһэ сылдьаллара, эппиэтинэһи бырахсаллара сатаммат”, – диэтэ.
Мунньах кыттыылаахтара муоста тутуутугар бэлэмнэнии хаамыытын кытта билистилэр. “ПВ “ВИС” ХЭУо бэрэстэбиитэлэ бу баараҕай тутуу түөрт сүрүн былаһааккалаах буолуо диэн эттэ. Ол курдук Өлүөнэ уҥа уонна хаҥас кытылларыгар иккилии тутуу былаһааккатын тэрийии былааннаммыт. Онуоха тутуу 4-с былаһааккаттан саҕаланыахтаах. Бу аттыгар тутааччылар олорор уопсай дьиэлэрэ тутуллуохтаахтар. Хабаровскайтан суол-иис тиэхиньикэтэ кэлиэхтээх. “ВИС” хампаанньа арыылары тутар тиэхиньикэни, уунан устар сириэстибэлэри, буурдары, уу аннынан сылдьар аппарааттары лиизиҥҥэ атыылаһар эбэтэр арендалыыр былааннааҕын эттэ. Тутуу бастакы түһүмэҕэр 500-чэкэ кэриҥэ киһи үлэлиэхтээҕэ этилиннэ. Онтон тутааччылар ахсааннара сыыйа элбээн иһиэхтээх. Хамсыгынан сиэттэрэн тутуу былаһааккаларыгар обсерватордары тэрийиэхтэрэ уонна киириини-тахсыыны хонтуруоллуур эрэсиим олохтонуоҕа.
Дмитрий Бердников хампаанньа бэрэстэбиитэллэригэр сүрүн айан суолугар мэһэйдэспэт эбии суолу-ииһи тутуу уонна электрическай эниэргийэ боппуруоһун учуоттуулларыгар, быһааралларыгар сорудахтаата. Кини тутууга баахта үлэһиттэрэ 30 %-нын уонна олохтоох испэсэлиистэр 70 %-нын ылыахтаахтар диэн бэлиэтээтэ. Онон өрөспүүбүлүкэ кыахтаах тэрилтэлэрэ бары тутууга кыттар кыахтаахтар. Маны таһынан, Саха сирин хампаанньалара төһө элбэх тимирдээх бетон матырыйаалы оҥоруохтарын сөбүн чуолкайдаатылар.
СӨ Ил Дарханын уонна Бырабыыталыстыбатын пресс-сулууспатын матырыйаалынан.
-
0
-
0
-
0
-
0
-
0
-
0
