Ол туһунан СӨ бырабыыталыстыбатын бэрэссэдээтэлин солбуйааччы Сергей Местников ситэриллээх былаас үлэтин тэлэбиисэр олохтоох каналынан отчуоттууругар иһитиннэрдэ.
«2021 сылга улахан соруктар тураллар. Өрөспүүбүлүкэ улуустарыгар 10 оскуола, 16 оҕо саадын тутан киллэриэхпит», -- диэтэ. Ону таһынан быйыл болҕомто орто анал үөрэх тиһигэр ууруллар. Кангалассы бөһүөлэккэ орто анал үөрэх биир кэлим кампустарын бырайыагынан үлэ ыытыллар.
Маны таһынан Сергей Местников отчуотугар 300 мөл. солкуобайы наука үлэһиттэрин чинчийэр үлэлэригэр көрөллөрүн туһунан эттэ. «Ил Дархан Айсен Николаев сорудаҕынан өрөспүүбүлүкэ научнай-техническай сайдыытын тосхолун судаарыстыбаннай бырагырааматын ылынныбыт. Ол бырагыраамаҕа киирбит наука чинчийиилэригэр 300 мөл. солк. көрүлүннэ. Бу бырагыраама 2024 сылга диэри ылылынна», -- диэн эттэ. Федеральнай бүддьүөттэн үбүлээһин көрүлүннэҕинэ, Саха сиригэр аан дойду таһымнаах научнай үөрэх киинэ тэриллиэн сөбүн туһунан иһитиннэрдэ. «Билигин дойду куонкуруһун иккис түһүмэҕэр бэлэмнэнэбит», -- диэн Сергей Местников бэлиэтээтэ.
-
0
-
0
-
0
-
0
-
0
-
0
