Украинаҕа анал байыаннай эпэрээссийэни ыытыыга, босхоломмут территорияларга тутуулары уонна инфраструктураны чөлүгэр түһэриигэ үгүс үп-харчы ороскуоттанарынан, кэлэр 2023 сылга бары эрэгийиэннэр бүддьүөттэрэ кэккэ ыарахаттары көрсөрө сэрэйиллэр. Манна даҕатан эттэххэ, РФ бары субъектарын бүддьүөттэрин 10% сарбыйаары гынарын туһунан аһаҕастык быһаарсыы барбыта ыраатта. Аны туран, эрэгийиэннэргэ дотацияны тыырыы методикатыгар уларыйыылар (бүддьүөт ороскуотун индексин орочуотугар, хамнас араастаһыытын коэффициеныгар) киирэннэр, ол түмүгэр Уһук Илин уокурук субъектара элбэҕи сүүйтэриэхтэрин сөп.
Маныаха биһиги өрөспүүбүлүкэбит баһылыга Айсен Николаев Уһук Илиҥҥи уокурук бары эрэгийиэннэригэр 2023 сылга дотацияны кыччаппакка, бу ааһан эрэр сыл курдук кээмэйинэн хаалларарга туруоруста.
Онуоха элбэх аргуменнарынан, сыыппараларынан дакаастаата. Сенатордар, дьокутааттар, бырабыыталыстыба чилиэннэрэ, ол иһигэр РФ үбүн миниистирэ Антон Силуанов, ити этиини кытта сөбүлэстилэр. Онон Саха Сирин 2023 сыллааҕы бүддьүөтүн кээмэйэ кыччыа суоҕа диэн эрэллээх буоллубут.
Айсен Сергеевич маны таһынан 2023 сылга Онкология өрөспүүбүлүкэтээҕи диспансерын федеральнай бүддьүөттэн толору үбүлүүргэ уонна быйыл үлэҕэ киллэрэргэ туруоруста. Ону Федерация Сэбиэтин Бэрэссэдээтэлэ Валентина Матвиенко өйөөтө. Бу эбийиэк үбүлэниитин, үлэҕэ киириитин Сенат тус хонтуруолугар ылыах буолла.
Манна даҕатан эттэххэ, күһүн кэлэн барбыт Михаил Мишустин 77 % бэлэм буолбут онкодиспансер тутуутун түмүктүү охсору өйөөбүтэ. “Докумуоннаргытын бэлэмнээҥ. Сыл бүтүүтэ экспертиза бигэргэтиитэ баар буолуоҕа. Көмөлөһүөхпүт”, -- диэбитэ.
Михаил Архипов,
Дьохсоҕон нэһилиэгин бэтэрээннэрин сэбиэтин бэрэсссэдээтэлэ,
Таатта.
-
0
-
0
-
0
-
0
-
0
-
0
