Н.Р. Степанов уулуссатын 26-с нүөмэрин икки кыбартыыралаах дьиэтэ ууга турарын, уу муостаттан 33 см. үөһэ тахсыбытын, 10 киһи, ол иһигэр 6 оҕо көһөрүллүбүттэрин туһунан суруйан турабыт.
Олортон биирдэстэрэ Наталья Сидорова буолар.
--Дьиэбит уопсай, социальнай куортамынан олоробут. Кыбартыыра иэнэ -- 59,6 кв.м. Элбэх оҕолоох дьиэ кэргэммит, 4 оҕолоохпут.
Билигин аймахтарыбытыгар баарбыт. Докумуоннарбытын ылбыппыт. Малларбытын үөһэ таһаара сатаатыбыт даҕаны, уу кэлэ турар. Ороннору эҥин сатаан өрө көтөхпөтүбүт. Ууга тураллар. Оҕолор кыһыҥҥы таҥастарын кырыыһаҕа таһаарбыппыт.
Кэргэним дьуһуурустубаҕа күн ахсын сылдьар. Быыһыгар дьиэтин көрөн кэлэр. Сайыҥҥы саппаас аспытын холодильникка харайан турбуппут. Уу кэлэн, дьоммутугар илдьэн уурдубут. Дьаһалта үлэһиттэрэ чаас ахсын уу таһымын бэрэбиэркэлииллэр. Метровкалыыллар, аахта суруйаллар. Сарсыарда муостаттан үрдүгэ 33 см этэ.
Бэйэбит санаабытыгар, уу быйыл улаханнык киирбитэ – баһаар содула. Ууну-хаары иҥэрэр, сииги тутар мас аччаан, баһаар кэннэ тута тыа сир аннынааҕы мууһа ууллан. Маны тэҥэ быһыппыт кыайан туппат буолан эрэр, -- диэн кэпсиир.
Надежда Алексеева Чаранская уулусса 4-с нүөмэрдээх дьиэтиттэн эмиэ көһөргө күһэллибит. Дьиэлэрэ эмиэ икки кыбартыыралаах уопсай дьиэ. Биэс оҕолоох дьиэ кэргэн билигин аймахтарыгар тахсан олорор.
--Биэс оҕоттон үһэ -- оскуола үөрэнээччитэ. Иккитэ – улахан дьон. Миигин кытары түөрт оҕом олорор. Кыбартыырабыт приватизациялаах, бэйэбит бас билиибитигэр баар. Дьиэм иһигэр билигин сатаан киирбэккэ сылдьабын, бэҕэһээ саҥа көспүппүт. Малбытын үөһэ таһаардыбыт. Кэргэмминээн хомуммуппут. Биэс оҕо таҥаһа-саба элбэх буоллаҕа дии, барытын быыһыы сатаатыбыт. Дьоммутугар олоробут. Сүөһүбүтүн эмиэ үрдүк сиргэ таһаардыбыт. Уопсайа 5 ыанар ынаҕы кытары субайдар бааллар. Хата, ыалбыт хотонугар миэстэ баар буолан биэрдэ. Оппут аҥаарын тиэйэн ыллыбыт, сорҕото хаалла. Хайдах да сатаан быыһаабатыбыт, ол эрээри сүөһүлэр син күөххэ үктэннэхтэрэ дии.
Халаан уута этэҥҥэ ааһар ини диэн эрэнэбит. Дьиҥэ, маннык сыл ахсын кыралаан кэлэр этэ. Күрүө иһин ылааччы. Оттон быйыл дьиэҕэ тиийдэ. Уу, хаар да элбэх быһыылаах, баһаар да оҕуста дии саныыбыт. Сарсыҥҥыттан уу таһыма түһэр ини. Онон наһаа уолуйбаппыт. Этэргэ дылы, халааҥҥа үөрүйэхпит. Урут эмиэ ууга бара сылдьыбыппыт.
Халаан уутун кэннэ, бадараан ыраастааһына, сууйуу-сотуу үлэтэ кэлэр. Аны ууга барбыт дьиэ хамсыыр. Билигин акылаат муостаны кытары силбэһэн турар. Ууну кыратык да буоллар, линолеум тутан турар быһыылаах. Муостаттан наһаа тахса илик курдук. Нэһилиэккэ икки дьиэ улаханнык ууга барда, - диир.
Чэмэлиинэ Потапова -- алта оҕолоох ыал ийэтэ. Ууга былдьанан эрэр Чаранская уулусса 4-с дьиэтин 2-с кыбартыыратын олохтооҕо.
Солоҕоннор халаан уутун сылын ахсын куттана күүтэллэр. Билигин түөрт оҕотун уонна кэргэнин кытары дьонугар көһөргө күһэллэн эрэллэр.
-Бу дьиэҕэ олорооччулар алтабыт. Икки оҕо – дьыссат дьоно, икки -- үөрэнээччи, оттон икки улахаттар Тааттаҕа үөрэнэллэр. Хата, халаан уута дьиэбит муостатынан халыйа илик, ол эрээри дьиэ акылаатын анныгар киирдэ. Күнү быһа маныыбыт, сотору-сотору көрөбүт. Аллараанан уута киирэ турар. Дьиэ анныта илийэн хаамыа диэммит санаарҕыыбыт, син биир өрөмүөн эрэйэрэ буолуо.
Дьиэ хаһаайката нэһилиэккэ оҕуруотчутунан биллэр. Ол эрээри быйыл халаантан сибээстээн, кыратык бытаарбыт. Уу түһэрин кэтэһэргэ күһэллэр.
- 0
- 0
- 0
- 4
- 1
- 0