Улуустар землячестволара бииргэ үлэлээһиннэрин тэрийиигэ Дьокуускай куорат баһылыгын иһинэн 34 улуус землячестволарын сэбиэтэ диэн общественнай тэрилтэ тэриллибитэ 5 сыл буолла. Бу кэм устата сэбиэт бары бииргэ олорор сирбит Дьокуускай куорат сайдарын, духуобунай барҕарыы, ийэ дойдуну таптыырга, көмүскүүргэ ыччаты иитии, төрөөбүт түөлбэни кытары сибээс быстыбатын туһугар күүһэ-кыаҕа тиийэринэн үлэлэһэр.
Улуустар землячестволарыттан биир үчүгэй үлэлээхтэрэ – “Таатта” түмсүү. Салайааччыта – куорат баһылыгын социальнай боппуруостарга солбуйааччы Владимир Владимирович Аржаков. Кини үлэтин нэһилиэк түмсүүлэригэр тирэҕирэн ыытар. Түмсүү үлэтин сүрүн хайысхата – куоракка олорор биир дойдулаахтарбытын түмүү, төрөөбүт улууспутугар, анал байыаннай дьайыыга көмө буолуу.
Тааттаттан төрүттээх урбаанньыттар анал байыаннай дьайыыга сылдьар саллааттарбытыгар массыынанан, дронунан көмөлөһөллөр, Мочкин Николай куруук посылка илдьиитигэр көмөлөһөр. Ахсынньыга Герой күнүгэр хорсуннук сэриилэһэ сылдьан өлбүт 80-тан тахса буойуммут дьиэ кэргэттэригэр кинигэ бэлэхтээтилэр.
В.В. Аржаков этиитинэн, биир дойдулаахтарбытын түмэр инниттэн, 2024 сылга улууспут салалтатын кытары Туймаада туонатыгар ыһыах тэрийэн ыыппыппыт. Ол түмүгэр биир дойдулаахтар түмсэн, төрөөбүт улууспутун кытары бииргэ күүскэ үлэлэһэммит, Манчаары оонньууларыгар улахан көмө оҥороммут, оонньуулар үрдүк таһымҥа ыытыллалларыгар олук уурбуппут.
Тааттаттан төрүттээх улуу убайдарбытын үйэтитиигэ үлэ ыытыллар. Куорат депутаттарыгар туруорсан, 203 микрорайоҥҥа баар “СМАРТ” библиотекаҕа саха классик суруйааччыта Николай Денисович Неустроев аатын иҥэрэллэрин ситиспиппит. Аны таас скульптуратын оҥотторон, библиотека уһаайбатыгар туруорууга үлэ бара турар.
Сорох нэһилиэктэр саҥа салайааччылаахтар. Ол курдук, Тыараһа лиидэринэн кытай тылын үөрэтэр киин салайааччыта Огонеров Гаврил Гаврильвич, Уус Тааттаттан төрүттээхтэргэ ХИФУ преподавателэ, филологическай наука кандидата Попова Матрена Петровна буолбуттара. Дьүлэй нэһилиэгин землячествота муус устар 7 күнүгэр отчуоттуур-быыбардыыр мунньаҕын ыытыахтаах. Бу күн “Сэргэлээх” остолобуойга, быыбары таһынан, Дьүлэй нэһилиэгин баһылыга О.Д. Осипов отчуота, Саха Өрөспүүбүлүкэтин норуотун маастара Изабелла Элякова сахалыы таҥастарын көрдөрүүтэ, кэнсиэр, дойду аһын амсайыы буолуохтаах.
Кулун тутар 31 күнүгэр “Таатта” түмсүү мунньаҕар 2026 сылга үлэбитин сүрүн хайысхатын быһаарсыы буолла.
Мунньахха Тааттаттан төрүттээх ыччат “Табыс” түмсүүтүн салайааччыта, Харбалаахтан төрүттээх Василий Слепцов активын кытары кэлэн кыттыыны ылла.
Улуу убайбыт Өксөкүлээх Өлөксөй эһиил төрөөбүтэ 150 сылын туолуохтаах. Бу кэрэ-бэлиэ даатаны көрсө, 5 сыллаах үлэ былаана ылыллыбыта. Землячество бу былаан туолуутугар салгыы үлэлэһэри сүрүн соругун быһыытынан ылынна. Онно болҕомто уурар туһуттан муус устар 21 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр таатталар кэнсиэр тэрийэр буоллубут.
Суруйда: Иван Гаврильевич Неустроев,
Дьокуускай куорат баһылыгын иһинэн республика улуустарын землячестволарын сэбиэтин салайааччыта, 1.04.2026
-
3
-
0
-
0
-
0
-
0
-
0
