Чахчыта да, судаарыстыба кыаҕа – бигэ туруктаах дьиэ кэргэттэрэ. Онон хас биирдии ыал бэйэтин үбүн-харчытын, баайын-дуолун, кэтэх хаһаайыстыбатын сөпкө дьаһанан, тутан-туттан, тыыран-суоттаан, байылыаттык олоруох тустаах. Ол туһугар бу маннык тэрээһиннэр ыытыллаллар.
Фестиваль аһыллытыгар Үп миниистирин эбээһинэһин толорооччу И.И. Алексеев, бу министиэристибэ отделын начаалынньыга С.Р. Колодезникова, Үөрэх миниистирин солбуйааччы В.А. Захарова, Киин баан Саха Сиринээҕи салаатын салайааччыта А.А. Конроплев, Үп-экэниэмикэ кэллиэһин дириэктэрэ А.В. Соломонова, өр кэмҥэ Үп министиэристибэтин салайбыт В.А. Жондоров уонна “Центр компетенций по финансовой грамотности РС (Я)” диэн киин салайааччыта Т.И. Борисова кыттыыны ыллылар.
Тэрээһин 12 секциянан ыытылынна, барыта 430-тан тахса киһи сырытта.
Улахан дьоҥҥо
Москваттан кэлбит эксперт, педагогическай университет доцена О.Г. Андреева кырыымчык да түгэҥҥэ харчыны сөпкө тыыран туттуу туһунан кэпсээтэ. Бу билиҥҥи дьалхааннаах кэмҥэ олус суолталаах үөрэх буолла.
Судаарыстыбаттан ханнык көмөнү дьиэ кэргэн ылыан сөбүй? Төлөөбүт нолуогуттан “вычет” диэни хайдах төнүннэрэр? Бэйэ дьыалатын арыныы туох ымпыктааҕый-чымпыктааҕый? Киһи бэйэтэ биисинэс-бырайыак суруйар кыахтаах дуо? Онтон да атын ыйытыыларга туһааннаах дьон хоруй биэрдилэр. Ол курдук, социальнай пуондаттан Н.П. Слепцов, Р.Б. Афанасьев, нолуок сулууспатыттан Н.А. Федоров, В.В. Макарова, Роспотребнадзортан Н.К. Федорова, Е.В. Яркова, биэнсийэ мунньуллуутун пуондатыттан Ю.А. Капитонова лиэксийэ аахтылар, боппуруостарга эппиэттээтилэр.
Оҕолорго
«Финансовый калейдоскоп» интерактивнай оонньууга оонньоотулар, үп-харчы тиэмэтигэр уруһуйдаатылар, кытай суругун-бичигин үтүгүннүлэр, дьоппуон оригамитын, сахалыы «Мамонтенок» оҥоһугу оҥордулар, дьаарбаҥка тэрилиннэ.
Эдэр ыччакка
“Молодежный городок” квизкэ күрэхтэстилэр. Үбү-харчыны үлүннэрии, дохуоту барыстаахтык туттуу-туһаныы сатабылларыгар уһуйар «Прокачай финансы» оонньуу тэрилиннэ.
Үп-экэниэмикэ, Сибээс уонна энэргиэтикэ кэллиэстэртэн, Сервис технологическай техникумуттан, Аартыкатааҕы агротехнологическай университеттан барыта 80 устудьуон кытынна.
Дьиэ кэргэҥҥэ
«Куттала суох табаар. Эрэллээх туһанааччы” диэн тиэмэҕэ былакаат, дьиэ кэргэн үбүн-аһын хайдах туһанарын-туттарын туһунан сэһэргиир «Финансовый код семьи» видеоролик, «Копейка рубль бережет» уруһуй күрэхтэрэ ыытылыннылар. Кыайыылаахтарга уонна кыттыбыт оҕолорго бэлэх туттардылар.
Бу дьиэ кэргэн фестивалын тэрийбит Үп-экэниэмикэ кэллиэһигэр (дириэктэр Соломонова Анастасия Васильевна) махтанабыт. Чуолаан түһүмэхтэри ыыппыт преподавателлэргэ: А.А. Афанасьеваҕа, Н.А. Киренскаяҕа, Д.В. Ильинаҕа, С.И. Санниковаҕа, Л.В. Попова, Н.В. Уларовка, А.А. Андрееваҕа, Т.И. Борисоваҕа, В.В. Семеноваҕа.
Тэрээһиҥҥэ сылдьыбыт дьон баҕа санааларын тиэртилэр: “Өссө да маннык фестиваль буола турдун!” – диэн.
Сырдаттылар Вилена Семенова, Татьяна Борисова
-
0
-
0
-
0
-
0
-
0
-
0
