Хаҥалас улууһун Улахан Ааныгар баар «Бөртө» сылгы собуота (дириэктэр Александр Павлов) кыралыын улаханнык 1000 сылгылаах, онтон аҥаара биэ. Хаһаайыстыба сылгыларын хас да сиринэн сайылатар.
Бодоҥо баазатын уопуттаах сылгыһыттара Александр Абрамов уонна Василий Павлов кымысчыт Юрий Уваров салалтатынан бу ый саҕаланыаҕыттан биэ ыыллар. Биирдии эрэ сылгы батар гына анаан оҥоһуллубут уһун, синньигэс ороскуолга биэс биэни субуруччу киллэрэн баран, ыаныллар биэни кэлин атаҕыттан быанан тартараллар.
Синньин сууйаллар, эмиийдэригэр ыыр аппараат «ыстакааннарын» кэтэрдэллэр. Өр-өтөр буолбат, аппараат куугуначчы тыаһыыр, дьэҥкир турба устун үүт эриэнньиктэнэ сүүрэн бидоҥҥа түһэр. Дьэ ол үүтүнэн Юрий Михайлович кымыс оҥорор.
Сопхуос саҕана манна кырдьаҕас сылгыһыт Степан Егорович Максимов биэ ыан кымыстыыр эбит, Юрий киниэхэ сыстан, 15 сааһыттан биэни ыырга уонна кымыстыырга үөрэммит. Бэйэтэ тутан-хабан кымыстаабыта номнуо 34 сыл буолбут. Кини кымыһын хаҥаластар үгэс буолбут төрүт ньымаларынан оҥорор: мас буочукаларга былырыыҥҥы кымыһынан оҥоһуллубут аһытыыга көөнньөрөр, ураты амтаны биэрээри, сылгы бэстээҕин (кэлин атаҕын иҥиирин) кырбаан кутар. Ол түмүгэр, кымыһа кырылыы кыынньар!
«“Туймаада” агрохолдинг» аахсыйаламмыт уопсастыба (генеральнай дириэктэр Петр Ефремов) тэрээһининэн Туймаада ыһыаҕар ыытыллар «Кымыс – Айыы аһа» бэстибээлгэ Юрий Уваров кымыһа бастыҥнар кэккэлэригэр сылдьар.
Хаартыскалары Ульяна Семенова ыытта.
-
1
-
0
-
0
-
0
-
0
-
0
