Пуорумҥа Ил Түмэн тутууга, олох-дьаһах хомунаалынай хаһаайыстыбатыгар уонна энергетикаҕа сис кэмитиэтин бэрэссэдээтэлэ Александр Корякин кытаанах хомунаалынай тобоҕу дьаһайыы туһунан 89 №-дээх федеральнай сокуонунан ыытыллар үлэни сырдатта.
-- Саха Өрөспүүбүлүкэтэ уонна Ямал-Ненец аптаныамынай уокуруга маарыннаһар өрүппүт элбэх: сирбит-уоппут киэҥ, Аартыка зонатыгар киирсэбит, сирбит аҥаара Хотугу эргимтэ нөҥүө сытар. Биир сүрүн уратыбыт чуолаан хотугу оройуоннарга нэһилиэнньэ ахсаана аҕыйаҕа, суол-иис мөлтөҕө буолар, – диэн тылларынан этиитин саҕалаата.
Салгыы 2025 сыл түмүгүнэн, өрөспүүбүлүкэҕэ 1 691 395 кубометр кытаанах хомунаалынай тобох, ол иһигэр Аартыкаҕа 120 632 кубометр тобох тахсыбытын иһитиннэрдэ. Аартыкаҕа суол-иис мөлтөх, нэһилиэнньэлээх пууннар ыраах буоланнар, бөҕү арааран дьаһайар эбийиэги тутар көдьүүһэ суох, ол иһин бөх-тобох миэстэҕэ уматылларын быһаарда. Саха Өрөспүүбүлүкэтин этиитэ учуоттанан, 2024 с. ахсынньы 26 күнүгэр бигэргэммит бөҕү-тобоҕу дьаһайыы уонна тулалыыр эйгэ харыстабылын туһунан федеральнай сокуоннарга уларытыылары киллэрэр туһунан 497 №-дээх федеральнай сокуоҥҥа «уустук суоллаах-иистээх территория» диэн өйдөбүл киирбитин, тобоҕу тиэйэр ыстаансыйалар көрүллүбүттэрин, тобоҕу мунньуу болдьоҕо «имигэс» буолбутун эттэ. Ити суола-ииһэ суох сирдэртэн тобоҕу кыһыҥҥы суолунан тиэйэр, логистиканы судургутутар уонна тарыып үрдүүрүн бохсор кыаҕы биэрбитин бэлиэтээтэ. Кытаанах хомунаалынай тобоҕу таһыы инфраструктуратын кэҥэтэр уо.д.а. үлэ ирдэнэрин иһитиннэрдэ диэн Ил Түмэн пресс-киинэ суруйар.
Хаартыска: Ил Түмэн саайта.
-
0
-
0
-
0
-
0
-
0
-
0
