1990 сыл бэс ыйын 12 күнүгэр РСФСР норуоттарын дьокутааттарын бастакы сийиэhигэр Арассыыйа Федерациятын судаарыстыбаннай суверенитетын туhунан Декларация ылыллыбыта. 1992 сыллаахтан бэс ыйын 12 күнүгэр судаарыстыбаннай суверенитет туhунан Декларация ылыллыбыт күнэ бэлиэтэнэр буолбута, онтон 2002 сыллаахха Арассыыйа күнэ олохтоммута.
Бу күн өрө көтөҕүллэн уонна махтанан туран, биhиги улуу дойдубут олорон кэлбит устуоруйатын эргиллэн көрөбүт, саҥа ситиhиилэри бэлиэтиибит. Арассыыйа киэҥ-нэлэмэн сиргэ тайаан сытарынан, сиртэн хостонор туhалаах баайынан биллэр, ол эрээри, дойдубут сүрүн баайа – хорсун санаалаах, инникигэ дьулуурдаах, араас эйгэҕэ таһаарыылаахтык үлэлиир-хамсыыр дьоно-сэргэтэ буолар. Ол курдук, биhиги литэрэтиирэбит уонна ускуустубабыт чулуу айымньыларынан, билим эйгэтигэр, бырамыысылыннаска үрдүк ситиhиилэрбитинэн, аныгы технологиялары хото киллэрэрбитинэн киэн туттабыт. Билигин Арассыыйа тутулуга суох буолуу хайысхатын бөҕөргөтөн, экэниэмикэтин сайыннаран, нэһилиэнньэ олоҕун-дьаhаҕын тупсарар улахан национальнай бырайыактары олоххо киллэрэн, иннин хоту дьүккүөрдээхтик баран иhэр.
Арассыыйа норуоттарын сомоҕолоһууларын сылын үөрүүлээх быһыыга-майгыга арыйар тэрээhиҥҥэ Бэрэсидьиэн Владимир Путин биhиги дойдубут элбэх омук олорор судаарыстыбатын быhыытынан үөскээбитин уонна үйэлэр тухары олохтоох норуоттар култуураларыгар, үгэстэригэр дириҥ ытыктабылы сүрүн бириинсип оҥостон кэлбитин тоhоҕолоон бэлиэтээбитэ. Ол өбүгэлэрбититтэн утумнаабыт өйдөhүүбүт-өйөhүүбүт, сомоҕолоhуубут бүгүҥҥү күҥҥэ улахан суолталаахтар, ыарахан кэмҥэ тирэх буолаллар.
Саха Өрөспүүбүлүкэтэ Арассыыйа биир саамай бөдөҥ уонна стратегическай суолталаах эрэгийиэнэ, култууралар алтыhыыларын холобура буолар. Биhиги ураты кэрэ айылҕалаах хотугу кыраайбытыгар үгүс омук иллээхтик-эйэлээхтик олорор, өбүгэлэрин ураты тыыннарын, үгэстэрин илдьэ сылдьар. Бэйэ-бэйэҕэ ытыктабыл, төрүппүтүгэр-ууспутугар харыстабыллаах сыһыан өрөспүүбүлүкэбит дьонун-сэргэтин түмэр, үлэҕэ-үөрэххэ кынаттыыр.
Күндү доҕоттор! Бу бэлиэ күҥҥэ барыгытыгар кытаанах доруобуйаны, чөл туругу, этэҥҥэ буолууну, эйэни, үтүөнү баҕарабын! Дойдубут сайдарын туhугар бары бииргэ үлэлиэххэ-хамсыахха!
Алексей ЕРЕМЕЕВ, Ил Түмэн Бэрэссэдээтэлэ
-
0
-
0
-
0
-
0
-
0
-
0
