Виктор Федоров норуот дьокутааттара 2024 с. ахсынньытыгар ылыммыт бүддьүөттэрэ 25-30% тосту уларыйбытын, үп-харчы туохха туттуллара уларытыллыбытын ыйда, ону быһаарарга парламент санаата тоҕо учуоттамматаҕын ыйытта. Бырабыыталыстыба бүддьүөккэ көннөрүүлэри киллэрэри этиэхтээҕин санатта. Дьокутааттар бүддьүөккэ көннөрүүлэри хаһан киллэрэбит диэн ыйыппыттарыгар: «Эбии дохуот суох”, — диэн эппиэттээбиттэрин аҕынна.
Кини аан бастаан бигэргэтиллибит ороскуот 332 млрд. солк. этэ, онтон 357 млрд. солк. буолан хаалбытын арыйда. 25 млрд. солк. уларыйыы тахсыбыт. 96 млрд. солк. үп улаатыннарыллыбыт, 71 млрд. солк. кыччаабыт.
СӨ Ааҕар-суоттуур балаататын бэрэссэдээтэлэ Алена Федорова Үп министиэристибэтин отчуотугар сокуону кэһии суоҕун биллэрдэ, бигэргэтиллибит бүддьүөт ороскуота 7%, ол эбэтэр 25 млрд. солк. аһары барбытын, уопсайынан, үп туохха туттулларын уларытыы 80 млрд. солк. тиийбитин иһитиннэрдэ. Судургутук эттэххэ, хас бэһис солкуобай аан бастаан анаммыт сирин уларыппыт.
«Үп туохха туттулларын уларытыыга кэһии суох эрээри, былаас ситэриилээх уоргана бэйэтин быраабын аһары туһаммыт дии саныыбын», — диэтэ Алена Федорова. Кини былаас икки салаата тэҥ буолуохтааҕын санатта.
Алена Атласова СӨ Бырабыыталыстыбатын дьаһалынан биэстэн элбэх оҕолоох ыаллары дьиэнэн хааччыйыыга 200 мөл. солк., элбэх оҕолоох ыаллар учаастактарын инфраструктуратын сайыннарарга 100 мөл. солк., тулаайах оҕолору дьиэнэн хааччыйарга 209 мөл. солк. устан, атыҥҥа ыыппыттарын эттэ. Социальнай хайысхаҕа бастакы кыбаарталга өссө 570 мөл. кыччаппыттарын тириэртэ. Ол иһин 2026 с. уонна кэлэр сылларга социальнай өттүнэн көмүскэлэ суох араҥаҕа көрүллэр үбү сарбыйбаттарыгар баҕа санаатын иһитиннэрдэ. Көмөҕө наадыйар дьон өссө саамай кыра өлүүтэ киирэрин биллэрдэ.
СӨ Бырабыыталыстыбатын бэрэссэдээтэлэ Кирилл Бычков үп туохха туттулларын уларытан биэрии резервнэй пуонданы кытта сибээстээҕин, ол ороскуотун 90% Анал байыаннай дьайыы кыттыылаахтарын, кинилэр дьиэ кэргэттэрин өйүүргэ ыытылларын туһунан иһитиннэрдэ. Маннык төлөбүр кээмэйэ төһө буоларын эрдэттэн былаанныыр кыаллыбатын, Кыайыыны ситиһэр туһугар түргэн-тарҕан туттунуу ирдэнэрин санатта.
Кини атын эрэгийиэннэр социальнай бырагыраамаларын сарбыйалларын этэн туран, Саха Сиригэр бырамыысыланнас уонна инвестиционнай бырайыактар көмөлөрүнэн дохуоппутун эбинэр кыахтаахпытын бэлиэтээтэ. Ону таһынан, бырабыыталыстыба үп-харчы ыстатыйатын уларытыыга Ил Түмэни кытта бииргэ үлэлииргэ бэлэмин биллэрдэ.
Мунньах түмүгэр Юрий Николаев 2025 с. алҕастарын хатылаабат курдук дьаһаныахтаахпытын, аны кыһын тоҥмот туһугар хомунаалынай хаһаайыстыбаҕа 40 млрд. солк. булуохтаахпытын, хантан даҕаны эбии харчы кэлбэтинэн сибээстээн, бары судаарыстыбаннай бырагыраамалар ороскуоттарын кыччаталларын туһунан эттэ. 2027 с. өссө ыарахан сыл кэлиэҕэ, РФ Үпкэ министиэристибэтэ сэрэппитинэн, федеральнай датаассыйа, нолуок киириитэ аччыаҕа. Ол иһин саамай наадалаах эрэ ороскуоту хаалларыахтара, кыһыны туоруур туһугар үбү көрүөхтэрэ.
Дьокутааттар 2025 с. судаарыстыбаннай бүддьүөт туолуутун туһунан сокуон барылын өйөөтүлэр, оттон аны күһүн 2026 с. бүддьүөккэ уларытыылары киллэриини дьүүллэһиэхтэрэ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
