Доруобай, дьарыктаах буоларга
Быраастар кыайан истибэт, харахтара мөлтөөбүт дьоҥҥо хайдах көмөлөһүөххэ сөбүн, сүһүөх, сүрэх-тымыр ыарыытын эмтиир ньыма, түөһэйиини, дьиэҕэ сыыһа-халты үктээн, охтууну хайдах сэрэтиэххэ сөбүн туһунан лиэксийэ аахтылар.
50-чаларын саҥа ааспыт эдэрчи дьон бэйэ дьыалатын арыйан, саҥа саҕалыыр урбаанньыттарга туох көмө оҥоһулларын, социальнай хантараак туһунан биллилэр. Биэнсийэҕэ тахсан баран бэйэ тэрилтэтин арыйбыт ситиһиилээх урбаанньыттар туохтан саҕалаабыттарын кэпсээн-ипсээн, атыттарга үтүө холобуру көрдөрдүлэр, истээччилэр санааларын кынаттаатылар.
Уопсастыбаннай үлэнэн дьарыктанар дьон өрөспүүбүлүкэ уонна федеральнай киин таһымыгар 10 мөл. солк. диэри гырааны хайдах ылыахха сөбүн туһунан иһиттилэр. Саастаах дьон күннээҕи олохторугар оҥоһуу өйү хайдах туһаныахтарын сөбүн көрдөрдүлэр. Онон бары өттүнэн эргиччи туһалаах пуорум ыытылынна.
Дьон олоҕо уһаан иһэр
Пуорум пленарнай мунньаҕар СӨ Бырабыыталыстыбатын бэрэссэдээтэлин солбуйааччы Анатолий Семенов, СӨ Үлэҕэ уонна социальнай сайдыыга миниистир Елена Волкова, СӨ Ыччакка уонна социальнай коммуникацияларга миниистир Петр Шамаев, СӨ Урбааҥҥа, атыыга-эргиэҥҥэ уонна туризмҥа миниистир бастакы солбуйааччыта Максим Карбушев, Ил Түмэн доруобуйа харыстабылын сис кэмитиэтин бэрэссэдээтэлэ Светлана Давыдова аҕам саастаах дьон доруобай, дьарыктаах буоларын туһугар судаарыстыба туох үлэни ыытарын туһунан иһитиннэрдилэр.
Бу бэртээхэй тэрээһини көҕүлээччи модератор, «Утум» НКО бэрэссэдээтэлэ Мария Христофорова пуоруму эрдэттэн былааннаабатахтарын, «Аврора» мэдиссиинэ клиникатын иһинэн үлэлиир Көхтөөх уһун үйэлэнии киинигэр сылдьар дьон баҕа санааларын истэн, кинилэр идиэйэлэринэн олоххо киирбитин туһунан билиһиннэрдэ. «Алмаас саас» диэн пуорум аатын СӨ Бырабыыталыстыбатын бэрэссэдээтэлин солбуйааччы Анатолий Семенов толкуйдаабытын туһунан бэлиэтээн туран, киниэхэ махталын биллэрдэ.
Кини өрөспүүбүлүкэҕэ мэдиссиинэ сайдан, сүрэх-тымыр ыарыыларын, искэни эмтиир киин аһыллан, быраастар мобильнай биригээдэлэрэ Аартыка улуустарын кэрийэ сылдьан, кытыы нэһилиэк олохтоохторун доруобуйаларын көрөн-истэн, ыарыы дириҥник олохсуйуон иннинэ кэмигэр булан эмтээн, уһун үйэлэнэргэ сөптөөх усулуобуйа тэриллэрин туһунан эттэ.
Күн бүгүн Саха Сиригэр дьон олоҕун уһуна 73,6 сааска тиийдэ, 191 000 тахса киһи 60-ын ааспыт, кинилэртэн 18 аарыма кырдьаҕас 100 сааһын атыллаабыт. Ил Дархан Айсен Николаев туруорбут соругунан 2030 с. олохпут уһуна 80 сааска тиийиэхтээх.
Ааптар хаартыскаҕа түһэриитэ.
-
0
-
0
-
0
-
0
-
0
-
0
