Тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова бэҕэһээ Хаҥалас улууһун Нөмүгү нэһилиэгэр сылдьан, тыа хаһаайыстыбатын улуустааҕы управлениетын начальнига Андрей Исаковы уонна нэһилиэк баһылыга Наум Устиновы кытары ходуһалар үүнүүлэрин көрдө-иһиттэ, отчуттары көрүстэ. Үүнүү куһаҕана суох эбит, хаһаайыстыбалар хотуурдарын тыаһаппыттар. Бугуллар, рулоннаах оттор кэчигирэһэн эрэллэр.
Санатан эттэххэ, логистика уонна материальнай-тиэхиньиичэскэй хааччыйыы боппуруоһун өрөспүүбүлүкэ салалтата хонтуруолга тутар. Ил Дархан Айсен Николаев сорудаҕынан, тыа хаһаайыстыбатын табаарын оҥорооччуларга оттук-уматык уталыппакка бэриллэр. Боппуруоһу сүрүннүүргэ бырабыыталыстыба бэрэссэдээтэлин бастакы солбуйааччы Дмитрий Садовников салайааччылаах суһал ыстаап тэриллэн үлэлиир. Оттооһун уонна күһүҥҥү хомуур үлэлэригэр аграрийдарга 10 тыһыынча туонна дизельнэй уматык итиэннэ 5 тыһыынча туонна бензин наада. Онуоха наадыйааччылар кэрискэлэрэ оҥоһулунна.
Хаартыска: Тыа хаһаайыстыбатын уонна ас-үөл бэлиитикэтин министиэристибэтин пресс-киинэ.
-
0
-
0
-
0
-
0
-
0
-
0
