Өрөспүүбүлүкэҕэ Байыаннай дьайыы бэттэрээннэрин күнүн от ыйын 1 күнүгэр бэлиэтииллэр. Бу күн мемориалларга, пааматынньыктарга сибэкки дьөрбөтүн уураллар, Анал байыаннай дьайыы кыттыылаахтарыгар босхо юридическай о.д.а. көмөнү оҥороллор. Бу күн Афганистан, Чечня сэриититтэн саҕалаан, бары байыаннай дьайыы бэтэрээннэрин түмэр, кинилэр эйэлээх олох туһугар доруобуйаларын, сырдык тыыннарын толук уурбуттарын кэнэҕэс көлүөнэҕэ санатар.
Ил Түмэн Бэрэссэдээтэлин солбуйааччы, байыаннай сулууспалаахтар, байыаннай дьайыы бэтэрээннэрин дьыалаларыгар, Аҕа дойдуга бэриниилээх буолууга иитиигэ уонна уопсастыбаннай түмсүүлэр боппуруостарыгар сис кэмитиэт бэрэссэдээтэлэ Александр Подголов мустубут дьону эҕэрдэлээн туран, бу бырааһынньык Арассыыйа таһымыгар өссө тахса илигин бэлиэтээтэ.
«Бу бэлиэ күн биһиги өрөспүүбүлүкэбитигэр бэлиэтэнэр, тус бэйэм Афганистан уоттаах хонуутун ааспыт элбэх буойун табаарыстардаахпын, Арассыыйа Дьоруойун Александр Рыжиковы кытта билсэр этим, күн бүгүн Анал байыаннай дьайыы кыттыылаахтарын кытта алтыһабын. Кыайыыны ситиһэргэ элбэх киһи үлэлиир, волонтердар, тэрилтэ салайааччылара көмөлөһөллөр. Ийэлэргэ, кэргэттэргэ бу харах уулаах бырааһынньык. Вьетнамҥа, Сирияҕа, Лаоска байыаннай дьайыыга кыттыбыт аҕыйах дьон хааллылар. Кэнэҕэс көлүөнэ кинилэр хорсун быһыыларын умнуо суохтаах.
Анал байыаннай дьайыы түмүктэннэҕинэ туһунан Кыайыы күнүн бэлиэтиир буолуохпут. Ол күн түргэнник кэлэрин күүтэбит!», — диэтэ Александр Подголов.
Кини өрөспүүбүлүкэ судаарыстыбаннаһын бөҕөргөтүүгэ кылаатын иһин Ил Түмэн Бэрэссэдээтэлин Махтал суругун байыаннай дьайыы бэтэрээнигэр, Чечня сэриитин кыттыылааҕар Нестер Нестеровка туттарда.
Ааптар хаартыскаҕа түһэриитэ.
-
0
-
0
-
0
-
0
-
0
-
0
