«Эһиги ытык иэскитин чиэстээхтик толордугут, бэйэҕитин тулуурдаах, хорсун, Аҕа дойдуга бэриниилээх буоларгытын көрдөрдүгүт. Күн бүгүн уопсастыбаҕа туһаны аҕала сылдьаҕыт, үүнэр көлүөнэни иитиигэ көмөлөһөҕүт, уопсастыбаннай үлэнэн дьарыктанаҕыт, настаабынньык буолаҕыт. Эһиги көҕүлээһиҥҥитинэн Байыаннай дьайыы бэтэрээннэрин күнэ киэҥ далааһыннаахтык ыытылынна. Араас сылларга Афганистааҥҥа, Чечняҕа, Сирияҕа, Анал байыаннай дьайыыга дойдубут интэриэһин көмүскээбит, саа-саадах тутан, куттала суох олоҕу хааччыйарга турууласпыт дьоммутугар махтаныах, сүгүрүйүөх тустаахпыт», — диэтэ Александр Максимов.
Кини министиэристибэлэргэ, биэдэмистибэлэргэ наадалаах тэрээһиннэргэ өрүү көхтөөхтүк кытталларын иһин махтанна. Бэтэрээннэргэ, кинилэр дьиэ кэргэттэригэр анаммыт мобильнай пууннар араас кыһалҕалаах боппуруостары быһаарарга көмө буолалларын бэлиэтээтэ. Тустаах үлэһиттэр социальнай көмүскэл хайысхатынан, дьиэ-уот, сир учаастагын, үлэ боппуруоһун быһаарарга сүбэ-ама биэрэллэр, мэдиссиинэ көмөтүн оҥороллор, бааһырбыт саллааттары чөлүгэр түһэрэргэ үлэлииллэр. Бэтэрээннэр дойдуларыгар эргиллэн кэлэн баран дьарыктаах, үлэлээх буолалларыгар, бэйэ дьыалатын арыйан, урбаанньыт буолалларыгар болҕомто ууруллар. Кинилэргэ гыраан бэриллэр, үбү-харчыны хайдах суоттуурга үөрэтэллэр.
Мобильнай пууннарга буойуннар уйулҕаларын тургутан көрөллөр, муниципальнай тэриллиилэргэ бэтэрээннэри кытта көрсүһүүлэри тэрийдилэр, тематическай быыстапкалары, туристическай, успуорт тэрээһиннэрин, төгүрүк остуоллары ыыттылар. Улуустарга Анал байыаннай дьайыы кыттыылаахтарыгар ыһыаҕы ыстылар, Аҕа дойдуну көмүскээччилэргэ уопсастыбаннай эйгэни арыйдылар.
Дьокуускайга Өрөспүүбүлүкэ болуоссатыгар улахан уопсастыбаннай-патриотическай бырагыраама чэрчитинэн, Аҕа дойдуну көмүскээччилэргэ анаммыт көһө сылдьар быыстапка, полевой куукуна үлэлээтэ, кэлбит дьоҥҥо саллаат хааһытын түҥэттилэр, волонтердар буойуннарга тигэр таҥастарын, харысхалларын көрдөрдүлэр. Бастакы бөлөх инбэлииттээх саллааттарга дьиэлэригэр тиийэн, көмө оҥордулар, фрукта наборун бэлэхтээтилэр. Түмүккэ болуоссакка биэдэмистибэннэй наҕараадалары туттардылар, айар кэлэктииптэр күүстэринэн эҕэрдэ кэнсиэри көрдөрдүлэр.
Александр Максимов эһиил Байыаннай дьайыы бэтэрээннэрин күнүн өссө үрдүк таһымҥа ыытарга, буойуннарга туһалаах, көдьүүстээх буоларын ситиһэргэ баҕа санаатын эттэ.
Кини Кыайыыны уһанса сылдьар хоһуун дьоҥҥо СӨ Ыччакка, социальнай коммуникацияҕа министиэристибэ Махтал суруктарын туттартаата.
Ааптар хаартыскаҕа түһэриитэ.
-
0
-
0
-
0
-
0
-
0
-
0
