Үгэс курдук бу аан дойдутааҕы улахан түһүлгэ биир киэн туттуута - «Уһук Илин уулуссата» диэн быыстапка үгүс бырайыактары билиһиннэриэхтэрэ. Манна Уһук Илиҥҥи федеральнай уокурук 11 эрэгийиэнэ уонна федеральнай министиэристибэлэр киэҥ павильоннара ааннарын тэлэччи аһыахтара. Быйылгы «Уһук Илин уулуссатын» сүрүн тиэмэтинэн РФ Бэрэсидьиэнэ биллэрбит Арасссыыйа норуоттарын сомоҕолоһууларын сыла, үгэстэр уонна култуура арааһын көрдөрүү, инвестиция бырайыактарын олоххо киллэрии уонна дьон олоҕун хаачыстыбатын тупсарыы буолуоҕа.
«Уһук Илин уулуссата» быыстапкаҕа биһиги Уһук Илин олоҕун элбэх өрүтүн уонна хатыламматын көрдөрөргө кыһаллабыт. Норуот айымньытын киэҥник тарҕатыы, духуобунай төрүттэри, устуоруйа уонна култуура өйдөбүнньүктэрин харыстааһын, этно-култуура уратылара, омуктар уонна этническэй холбоһуктар култуурунай уратылара бүгүн ураты болҕомтоҕо киирдилэр. Маннык соругу РФ Бэрэсидьиэнэ Владимир Владимирович Путин туруорда. Арассыыйа норуоттарын сомоҕолоһууларын сылларыгар биһиги Пуорум кыттыылаахтарыгар уонна ыалдьыттарыгар, быыстапканы көрөөччүлэргэ тоҕо Уһук Илини таптыырбытын уонна тугунан киэн туттарбытын көрдөрүөхпүтүн баҕарабыт», – диэн РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, «Илиҥҥи экэнэмиичэскэй форум» тэрийэр кэмитиэтин бэрэссэдээтэлэ Юрий Трутнев эттэ.
«Северный рассвет в Якутии» павильон сүрүн түөлбэлэрэ Саха Сирин аныгы өрүттэрин арыйан көрдөрүөхтэрэ. «Тропики в вечной мерзлоте» экспозиция Хотугу кыраай усулуобуйаларыгар сыл устата сири оҥоруу ураты уопутун туһунан кэпсиэҕэ, «Инвестируй в Якутию!» түөлбэ бөдөҥ инбэстииссийэлиир бырайыактары уонна эрэгийиэн сайдыытын кэскилин сырдатыаҕа, оттон «Открой Якутию» диэн эйгэ ыалдьыттары өрөспүүбүлүкэ туризмҥа уонна билимҥэ баар кыаҕын кытта билиһиннэриэҕэ. «Якутия – Земля Героев» экспозиция өрөспүүбүлүкэ олохтоохторун хорсуннарыгар, төрөөбүт дойдуну көмүскүүр кылааттарыгар уонна куттал суох буолуутун эйгэтин аныгы технологияларыгар ананыаҕа, ону тэҥэ «Сделано в Якутии» атыы-эргиэн эрээтэ үгэс курдук бренд буолбут уонна олохтоох оҥорон таһаарааччылар бородууксуйаларын көрдөрүөхтэрэ.
Ааспыт сыллааҕы пуорумҥа Саха Сирин экспозицията улахан сэҥээриин ылан, Уһук Илиҥҥи эрэгийиэннэр икки ардыларыгар ыытыллыбыт куонкуруска “Бастыҥ култуурунай бырагыраама” номинацияҕа кыайыылаах аатын ылан, үрдүк наҕарааданан сыаналаммыта.
Быйыл эмиэ бу таһымы тутан, Саха Сирин үгүс өрүттээх баай нэһилиэстибэтин аныгы олох ситиһиитин кытары бииргэ тутан көрдөрөр соруктаахтар. Быыстапка сүрүн кэнсиэпсийэтэ – өрөспүүбүлүкэбитин аһаҕас эйгэлээх, кыахтаах эрэгийиэн быһыытынан билиһиннэрии. Экспозиция ааптардарын кыһамньыларынан, айылҕабыт баайын үйэлэри уҥуордаан, харыстанан кэлбит үгэстэрбитин кытта сөп түбэһиннэрэн, омуктар сомоҕолоһуулара уонна үрдүкү технология ситиһиилэрэ көрдөрүллүөхтэрэ. Маннык тэринии саҥа инвестордар интэриэстэрин тардыыга туһуланар, туристар сэҥээриилэрин ылыахтаах уонна эрэгийэн туруктаахтык сайдарын кэрэһэлиэхтээх.
«Саха Сиригэр Арассыыйа норуоттарын сомоҕолоһуулара — күннээҕи олохпут чахчыта. Биһиги култуура элбэх көрүҥнээҕин, өрөспүүбүлүкэбитигэр олорор бары норуоттар үгэстэрин ытыктыыбыт уонна устуоруйа нэһилиэстибэтин харыстыыбыт. Төрөөбүт дойдуга тапталбыт биһиэхэ күүс биэрэр, аныгы олох ситиһиилэрин тутуһаммыт, биһиги бииргэ айабыт-тутабыт», — диэн Ил Дархан Айсен Николаев бэлиэтээтэ.
Быыстапка пуорум кыттыылаахтарыгар балаҕан ыйын 1күнүттэн 4 күнүгэр диэри аһаҕас буолуоҕа, оттон балаҕан ыйын 5, 6 уонна 7 күннэригэр баҕалаахтарга барыларыгар арыллыаҕа.
Хаартыскалар СӨ Ил Дарханын уонна бырабыыталыстыбатын пресс-сулууспатытыттан
-
0
-
0
-
0
-
0
-
0
-
0
