Үлэ дьонун үөрүүтүн үллэстэн, сыах аһыллыытыгар Ил Түмэн дьокутаата Анрей Находкин, улуус дьокутааттарын сэбиэтин бэрэссэдээтэлэ Иннокентий Андросов, нэһилиэк баһылыга Айаан Чичахов сырыттылар.
– Саҥа сыах тутуутун 2021 сылтан, улууспут уонна нэһилиэкпит 1,5 мөлүйүөн солкуобай харчыны көрбүттэригэр тирэҕирэммит аҕалаабыппыт. Онтон 2023 сыллаахха Тыа хаһаайыстыбатын уонна ас-үөл бэлиитикэтин министиэристибэтин граныгар хотоммут, 1,8 мөлүйүөнү ылбыппыт. Онно улууспут дьаһалтата 800 000 солк. харчыны көрөн уонна бэйэбит 900 000 солк. угаммыт, саҥа астыыр тэрили атыыласпыппыт. Ону тиэйтэрэн аҕалан таҥыыга, уотун-күөһүн тардыыга уонна докумуоннары оҥорууга балачча уһун бириэмэ барбыта, инньэ гынан, сыахпыт силигэ ситэн, үлэҕэ киириитэ биһиэхэ улахан үөрүүлээх, – диир «Бүтэйдээх» кэпэрэтиип салайааччыта Андрей Слепцов.
Кэпэрэтиип сыл устата 227 туонна үүтү соҕотупкалыыр былаанын бу ый саҕаланыытыгар 70 %-ынан толорбут. Манна үүтү олохтоох «Табаҕа» хаһаайыстыба итиэннэ бааһынайдар туттараллар. Сыахха маастар Изабелла Егорова салалтатынан лабараан Нина Софронова, оробуочайдар Афанасий Слепцов, Зоя Слепцова үлэлииллэр. Саҥа астыыр тэрили үчүгэйдик баһылаан истэхтэринэ, үүтү ыаллыы нэһилиэктэртэн эмиэ тутуохтаахтар. Ону сэргэ аһытыллыбыт үүт ас арааһын оҥоруохтаахтар. Кэпэрэтиип бу астыыр сыаҕы таһынан сылгы иитэр, билиҥҥитэ 25 сылгылаах.
Хаартыска: Екатерина Захарова.
-
0
-
0
-
0
-
0
-
0
-
0
