Образование

2025-2026 үөрэх дьылыгар 93 үлэһиттээх, 2-7 диэри саастаах 524 кырачааны билии, сайдыы суолунан үктэннэрэн, иитэр-үөрэтэр үлэтин саҕалаата. Барыта 18 бөлөхтөөх: 10 сахалыы, 8 нууччалыы. Уопсайа 37 иитээччилээхпит уонна 12 анал исписэлиис.

  Педагогическай кэлэктиип Марианна Афанасьевна Иванова сэбиэдиссэйдээх  5 сыл устата айбыт, чочуйбут, мунньуммут үтүө үгэстэригэр тирэҕирэн, оҕону эт-хаан, билии-көрүү өттүнэн сайдыылаах, ситиһиилээх дьон буолалларыгар, үтүөҕэ, кэрэҕэ, саҥаҕа, тулалыыр эйгэни сыаналыырга иитэбит-үөрэтэбит.

Уһуйааммыт оскуола иннинээҕи үөрэхтээһин федеральнай биир кэлим үөрэтии бырагырааматынан үлэтин салайынар.  Сүрүн хайысхата – үс тылынан иитии уонна иитэр-үөрэтэр үлэни үөрэхтээһин муодулунан бырайыактааһын. Бу үлэни сүрүннүүр тутаах дьоммут – сэбиэдиссэй О.А. Чемезова, сэбиэдиссэйи уопсай үөрэхтээһиҥҥэ солбуйааччы Л.С. Борисова, сэбиэдиссэйи иитэр-үөрэтэр үлэҕэ солбуйааччы С.С. Ю, иитээччи А.М. Бугаева, итиэннэ административнай-хаһаайыстыбаннай үлэни тэрийээччи Н.Н. Кириллин.

Оскуола иннинээҕи үөрэхтээһин саҥа саҕахтарын, аныгы үйэ саҥа технологияларын олоххо киллэриигэ иитээччилэр «Полилингвальные образовательные модули как механизм реализации ФОП ДО с учетом региональных особенностей и запросов участников образовательных отношений в детском саду «Сардаана» г. Якутска» диэн инновационнай бырайыагынан үлэлиибит.

СӨ “Лаборатория детства” автономнай тэрилтэтэ оҕо уһуйааннарын түмэн, Ресурснай киини үлэлэтэр, онно биһиги дьыссааппыт биир бастыҥ үлэлээҕинэн биллэр.

Ю.И. Семенов салайааччылаах “Лаборатория детства” иһинэн оскуола иннинээҕи саастаах оҕолору патриотическай иитиигэ туһаайан,  икки тылынан “Үрүйэчээн” уонна «Родничок» парциальнай бырагырааманы олоххо киллэриигэ тирэх дьыссаат буолабыт.

Бу бырагыраама технологиятыгар олоҕуран, оҕо ис кыаҕын арыйан, интэриэһин, сатабылын таба тайанар тиэмэлэрдээх, ис хоһоонноох үөрэхтээһин муодулларын иитэр-үөрэтэр үлэбитигэр киллэрэбит.

 Оҕону кыра сааһыттан айылҕатыттан бэриллибит талаанын, дьоҕурун уһугуннарар, арыйар сыаллаах араас хайысхалаах куруһуоктар, секциялар, дьарыктар тиһигин быспакка тэриллэллэр.

Экологическай иитиигэ анал бырайыактаахпыт – оҕо агролабораторията, тэпилииссэ, дьыссаат тэлгэһэтигэр оҕуруот аһын толору үүннэрэбит, дьыссаат тиэргэнин тула араас сэппэрээктэри, мастары, сибэккилэри үүннэрэбит. Бу барыта оҕо, төрөппүт киэҥ сэҥээриитин ылар.

Дьокуускай куораты көҕөрдүү, киэргэтии  күрэҕэр сылын аайы ситиһиилээхтик кыттан, быйыл Губинскай уокурукка бастакы, куоракка иккис миэстэни ыллыбыт.

Иитии, үөрэтии уонна сайыннарыы иитээччи идэтин таһымын үрдэтииттэн, кэҥэтииттэн, үлэтин таһымыттан быһаччы тутулуктаах. Биһиги иитээччилэрбит уопут атастаһыы тэрээһиннэригэр, идэни тургутуу күрэхтэригэр тиһигин быспакка кыттан, ситиһиилэрэ элбэх. Холобура, үрдүк категориялаах иитээччилэр М.И. Слепцова «Почетный наставник», Дьокуускай куорат баһылыгын “Төрөөбүт тылынан иитии” анал бириэмийэтин 2025 сыллаах кыайыылааҕа М.И. Ядреева, куорат иһинэн ыытыллыбыт дьарыктары көрүү-күрэх кыайыылааҕа Нь.А. Степанова,  Дьокуускайдааҕы С.Ф. Гоголев аатынан педагогическай колледж Үөрэх министиэристибэтин иһинэн ыытыллыбыт өрөспүүбүлүкэтээҕи күрэҕэр Ю.В. Акимова “Үөрэтии  бастыҥ дьарыга ”, Л.П. Иванова “Төрөөбүт тылынан иитиигэ үлэ бастыҥ уопута” анал ааттары ылбыттара.

Эдэр иитээччилэргэ настаабынньык иитээччилэр С.А. Григорьева, И.Н. Павлова, Е.В. Спиридонова, Т.С. Пахомова, Л.В. Азарова курдук айылҕаттан оҕону иитэр талааннаах, киэҥ билиилээх, уопуттаах иитээччилэр методическай үлэҕэ күүс-көмө буолаллар.

Дьыссаат иһинэн үлэлиир методическай холбоһук таһаарыылаахтык үлэлииригэр лиидэрдэр: О.П. Черемкина, С.Р. Саввинова, К.Н.Нифонтова, М.Т.Баратова.

Сылын аайы оскуолаҕа бэлэмниир 4 бөлөҕү барыта 126-128 оҕо бүтэрэн, оскуола боруогун атыллыыр.

Иитиллээччилэрбит өрөспүүбүлүкэ, куорат, Губинскай уокурук ыытар араас күрэхтэригэр -  ырыа, үҥкүү, хоһоон, дакылаат, дуобат, спорт, илиинэн айар оҥоһук быыстапката, о.д.а. - актыыбынайдык кытталлар, кыайыылара элбэх.

Бастакы сэбиэдиссэйбит М.А. Иванова көҕүлээһининэн, ППМИ куонкуруһугар кыайан, иитээччи сыралаах уонна бочуоттаах үлэтин киэҥ эйгэҕэ таһаарар, бу идэҕэ ытыктабылы, тапталы иитэр соруктаах, 2023 сыллаахха Дьокуускай куорат 203 түөлбэтигэр Иитээччи скверин оҥотторбуппут. Бу боруонсаттан пааматынньык ааптара – Саха сирин үтүөлээх худуоһунньуга, талааннаах скульптор А.А. Романов. Сайын аайы араас сибэкки олордон, оту сиэмэнэн үүннэрэн, мастары олордон көҕөрдөбүт.

Тапталлаах уһуйааммыт 5 сыллаах үбүлүөйүн алтынньы 3 күнүгэр бэлиэтээбиппит. Ил Түмэнтэн Антонина Григорьева, куорат үөрэҕин салалтатыттан Гаврил Леонтьев, куорат Думатыттан Александр Яковлев,  С.Ф. Гоголев аатынан педагогическай колледжтан Анисия Скрябина, Кыыдаана Данилова, Губинскай уокуруктан Анна Келина кэлэн эҕэрдэлээбиттэрэ.

 Кэнчээри ыччат кэскилин түстүүр "Сардаана" оҕо сайдар киинэ өрөспүүбүлүкэҕэ туһалаах дьону иитэн таһаарыыга көдьүүстээх үлэтэ өссө үрдүк үктэллэргэ тахсан иһиэ диэн эрнэбит уонна онно бары күүһү  ууран туран үлэлиибит.  

 Саргылана Степановна Ю,

сэбиэдиссэйи иитэр-үөрэтэр үлэҕэ солбуйааччы.