Издательский дом Редакция Подписка
Погода в Якутске: . -11 oC

Быйыл от ыйын 4-9 күннэригэр Уус Алдан улууһун Бороҕон нэһилиэгэр Саха Сирин норуоттарын VIII спортивнай оонньуулара ыытыллаллар.

Быйыл от ыйын 4-9 күннэригэр Уус Алдан улууһун Бороҕон нэһилиэгэр Саха Сирин норуоттарын VIII спортивнай оонньуулара ыытыллаллар.

Оонньууларга бэлэмнэнии тэрээһинин, улуус олоҕор суолтатын туһунан Уус Алдан улууһун спорка, дьиэ кэргэҥҥэ уонна ыччат бэлиитикэтигэр салаатын начаалынньыга Константин Давыдов кэпсээтэ.

7f9653d9 b627 40e9 bc42 9ca9059184bb

Үрдүк таһымнаахтык ыытарга кыһаллабыт

--Оонньууларга улуустартан уонна Хотугулуу-Илиҥҥи федеральнай, итиэннэ Аартыкатааҕы агротехнологическай университеттартан, орто анал үөрэх кыһаларыттан барыта 40 хамаанда кыттыахтаах.

 Билигин сайаапка биэрбэттэр, тоҕо диэтэххэ, хамаанданы сүүмэрдиир күрэхтэһиилэр буола тураллар. 19 көрүҥтэн 12-тэ түмүктэннэ. Аны 7 көрүҥҥэ сүүмэрдиир хаалла. Чэпчэки атлетика, многоборье, ГТО, ПОДА (поражение опорно-двигательного аппарата) спортсменнарыгар чэпчэки атлетика, спортинг, оҕунан ытыы, баскетбол 3×3, курдук көрүҥнэр сүүмэрдиир күрэхтэһиилэрэ өссө да буола илик. 2022 сыллааҕы спортивнай оонньууларга оҕолор уонна бэтэрээннэр кыттыахтара суоҕа, 2004 сылтан ыла төрөөбүт спортсменнар эрэ күрэхтэһиэхтэрэ.

Бары билэрбит курдук, Мүрүбүт  киэҥ нэлэмэн туонатыгар үс нэһилиэк олорор. Ыалдьыттар, кытта кэлбит дьон, спортсменнар, бэрэстэбиитэллэр, тэрийээччилэр, волонтердар ол нэһилиэктэр оскуолаларынан, дьыссааттарынан түһүөхтээхтэр. Олохсуйуу барыта Мүрү алааһын иһигэр буолуоҕа. Үгүс улуус бу кыһын, саас улахан дэлэгээссийэлээх кэлэн, номнуо түһэр сирдэрин быһаарсан, көрөн барбыттара.

Саха Сирин норуоттарын VIII спортивнай оонньууларын кыттыылаахтара ковид утары быһыыны ылбыт уонна ПЦР анаалыс туттарбыт буолуохтаахтар. Манчаары оонньууларыгар быһаччы финал ыытыллыбыт буоллаҕына, быйыл, урукку кэмнэргэ курдук, үс түһүмэҕи тэрийэбит: муниципальнай, өрөспүүбүлүкэтээҕи уонна Уус Алдаҥҥа финальнай.

Саха Сирин Ил Дархана Айсен Николаев: “2022 сыллааҕы спортивнай оонньуулар өрөспүүбүлүкэ олоҕор биир улахан тэрээһининэн буолуохтара”, -- диэн эппитэ, онон биһиги ону үрдүк таһымнаахтык ыытарга кыһаллыахпыт.

Оонньуу талисмана кыһыары саас талыллан бигэргэммитэ -- Дьөҕөгөй оҕото. Эмблеманы талар куонкуруска араас улуустартан элбэх матырыйаал киирбитэ. Онтон үксэ кулунчук этэ. Ол иһин үгүс киһи баҕатын толороммут, оонньуу бэлиэтинэн Дьөһөгөй оҕотун талбыппыт.

2b875c48 689c 4675 869a a9dd8d3775d8

Саҥа спортивнай эбийиэктэр

--Спартакиадаҕа аналлаах 3 эбийиэк график быһыытынан киириэхтээх:

1. Тыһыынча миэстэлээх стадион тутулла турар.

2. Мындаабаҕа единоборство саалата киириэхтээх. Манна тустуу, бокс көрүҥнэринэн дьарыктанар, күрэхтэһэр буолуохтара. Онно 32 миэстэлээх уопсай дьиэлээх буолар.

3. Оройуоммут киинигэр Николай Тарскай саалата көтүрүллэн, ол оннугар спорт улахан дыбарыаһа тутулла турар. Бу -- чэпчэки атлетиканан дьарыктанарга 200 миэтэрэ эргиччи сүүрэр манежтаах, элбэх функциялаах спортивнай комплекс буолуоҕа. 7000 кэриҥэ кв. м иэннээх, 2 этээстээх саала буолар. Саамай кэтэһэр уонна элбэх киһи сылдьыа диир эбийиэкпит.

Хомойуох иһин, ити дыбарыас быйыл кыһын киирэр, бу оонньууларга кыайан ситиспэтибит. Ол иһин хамаандалаах, мээчиктээх оонньуулары, футбол буоллун, волейбол буоллун, атын бэйэбит кыра саалаларбытынан түҥэтэммит, күрэхтэһиини син биир ыытыахтаахпыт. Спортивнай комплекс уонна единоборство саалата национальнай бырайыак чэрчитинэн тутуллаллар.

4e921df9 7545 4502 a8f4 732328cfb68b

Тупсар, киэркэйэр

--Оонньууларга анаан бөһүөлэги тупсарыы, өрө тардыныы үлэтэ күүскэ бара турар. Ол курдук, билигин тэрилтэлэр бары сибэкки үүннэрэ сылдьаллар. Халлаан үчүгэйдик сылыйдаҕына таһааран олордуохтара. Маны тэҥэ тэрилтэлэр, уопсай дьиэлэр бэйэлэрин олбуордарын оҥосто, өрөмүөннүү сылдьаллар. Нэдиэлэ аайы улууспут баһылыгын дьаһалынан «Чистый четверг» диэн субуотунньук буолар.

Амма улууһа 4 сыл бэлэмнэммит буоллаҕына, биһиэхэ бэлэмнэниигэ 3 эрэ сыл бэриллибитэ. Бары бэркэ билэргит курдук, Амма ол саҕана уу халааныгар баран, оонньуу биир сыл көһөн биэрбитэ. Ол иһин биһиги биир сылбыт онно сүтэн хаалла. Бу 3 сыл иһигэр бары көрө-истэ сылдьаҕыт – икки сыл пандемия хааччахтааһына, аны билигин Украинаҕа анал операция ыытылла турар. Онон 3 сыл былаһын тухары, этэргэ дылы, байыаннай балаһыанньаҕа бэлэмнэнэ сылдьабыт диэххэ наада.

исправленный

ГТО баар буолла

--Быйылгы оонньууларга уопсайа 19 көрүҥҥэ күрэхтэһиэхпит. Ол курдук, аэробика, волейбол, мини-футбол, чэпчэки атлетика, остуол тенниһэ, көҥүл тустуу, дуобат, саахымат, оҕунан, буулдьанан ытыы, спортинг, бокс, гиирэны анньыы уонна быйылгы уларыйыыбыт – аан бастакытын ГТО многоборьета, итиэннэ баскетбол 3×3 олимпийскай көрүҥэ киирдилэр. Истибэт, саҥарбат уонна көрбөт дьоҥҥо аналлаах ПОДА диэн күрэхтэһии эмиэ баар буолуоҕа. Бу көрүҥнэргэ дьахталларга уонна эр дьоҥҥо тус-туһунан түмүктэр тахсаллар. Ол иһин көрүҥмүт ахсаана 19 курдук буолла.

Спорт салайааччыта буоларым быһыытынан, көрүҥү барытын сөбүлүөхтээх буоллаҕым дии. Ол эрээри тустуук буоларым быһыытынан, тустууну ордоробун. Оонньуулаах көрүҥнэр сүрдээх элбэх интэриэһи тардыахтара дии саныыбын. Аммаҕа волейбол, футбол, остуол тенниһэ уонна чэпчэки атлетика үгүс көрөөччүнү тардыбыттара.

Дьиҥэр, бу спартакиадаҕа киирбит көрүҥнэр барыта кэрэхсэбиллээхтэр, ол иһин да Саха Сирин норуоттарын спортивнай оонньуулара киэҥ сэҥээриини ыллахтара.

Мээчиктээх

Төрүт көрүҥнэр сайдыахтаахтар

--Төрүт көрүҥнэрбитин сайыннарар булгуччу наада. Онно анаан түөрт сылга биирдэ Саха Сирин олимпиадата дэнэр Манчаары оонньуулара буолаллар. Күрэхтэһии барыта саха төрүт көрүҥнэригэр ыытыллар. Ол курдук, хабылык, хаамыска, мас тардыһыыта, хапсаҕай, национальнай ыстаныы дьиссипилиинэлэригэр спортсменнар кыахтарын холонон көрөллөр. Онон Манчаары оонньуута, бу буолаары турар спортивнай оонньуу курдук, сүрдээх далааһыннаахтык ыытыллар. Мас тардыһыытыгар быйыл сайын аан дойду чөмпүйэнээтэ Дьокуускайга буолар. Мас-рестлинг  сүрдээҕин таҕыста. Аан дойдуга элбэх федерация тэрилиннэ. Хапсаҕай даҕаны ити курдук тахсарыгар баҕарабын, тахсыа диэн эрэнэбин.

b36bd8f2 3d3c 47c4 b665 6a33f94812da

Улуус олоҕор суолтата

--Бу аҥаардас спорт эрэ бырааһынньыга буолбатах, инфраструктурабыт, суолбут-ииспит тупсуохтаах. Улууска оскуола, дьыссаат, култуура дьиэлэрэ, хочуолунай, спортивнай эбийиэктэр --  барыта бу тэрээһининэн сибээстээн биһиэхэ ыытылыннылар. Онон бу оонньууларынан Уус Алдаҥҥа улахан сайдыы бара турар диэн сыаналыыбыт.

Улуус дьоно-сэргэтэ билигин бу оонньууларынан тыынан олорор. Буолара икки ыйы кыайбат бириэмэ хаалла. Күүстээх бэлэмнэнии бара турар. Этэргэ дылы, бу тэрээһин улууһу барытын биир ыал курдук түмтэ. Бары биир сүрүн сыалга-сорукка киирэммит, улууспут баһылыгын тула түмсэн, өссө сомоҕолостубут, элбэх үлэни ыыттыбыт.

Онон бу оонньуулар оройуон олоҕун сэргэхситтилэр. Барыгытын от ыйыгар Уус Алдаҥҥа күүтэбит!

  • 3
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением