Бэс ыйын 16 күнүгэр сенатордар уонна «Биир ньыгыл Арассыыйа» дьокутааттара Судаарыстыбаннай Дуумаҕа байыаннай дьайыылар бэтэрээннэрэ статуһу Украинаҕа бара турар анал операцияҕа кыттар гражданскай сирэйдэргэ иҥэрии туһунан сокуон барылын киллэрдилэр.
Чопчулаатахха, бырайыак «Бэтэрээннэр тустарынан» федеральнай сокуон 3-с уонна 16-с ыстатыйаларыгар уларыйыы киллэриини этэр.
«Сокуонунан бигэргэммит өйөбүлүнэн Украина, Донецкай уонна Луганскай норуот өрөспүүбүлүкэлэрин сиригэр ыытылла турар анал байыаннай операция кыттыылаахтара уонна кинилэр дьиэ кэргэннэрэ туһаныахтаахтар» диэн докумуон быһаарар суругар этиллэр.
«Украинаны неонацистартан босхолооһун барыбыт уопсай үлэбититтэн тутулуктаах, — диир сокуон ааптара Владимир Васильев. — Байыаннайдар эрэ туруулаһа сылдьар буолбатахтар, ыарыһахтарга, эчэйбиттэргэ көмөлөһөр быраастар, байыаннай тиэхиньикэни өрөмүөннүүр исписэлиистэр, алдьаммыт инфраструктураны чөлүгэр түһэрэр тутааччылар уонна да атыттар эмиэ эйэлээх олоҕу түстэһэргэ түбүгүрэллэр. Кинилэр билиҥҥи кэм дьоруойдара, онон өйүүр эбээһинэстээхпит».
«Бүгүн «Биир ньыгыл Арассыыйа» гражданскай сирэйдэргэ байыаннай дьайыылар бэтэрээннэрэ статуһу иҥэрэр туһунан сокуон барылын киллэрдэ. Бу дьоҥҥо көрүллэр социальнай өйөбүл барыта төлөнөр буолуо, — диэн фракция салайааччыта бэлиэтиир. — Дьокутааттар сокуон барыла саамай кылгас кэм иһигэр ылылларыгар күүстэрин ууруохтара”.
- 1
- 0
- 0
- 0
- 0
- 0