2022 сыл бүтүөр диэри «Тренер-преподаватель» диэн профессиональнай ыстандаарт киириэ. Оччотугар спорт оскуолаларыгар уонна кииннэригэр үлэлиир тренердэргэ педагогическай үлэһит статуһун биэриэхтэрэ.
Маннык нуорма «О физической культуре и спорте» сокуоҥҥа уларытыылары киллэрэр былаан барылларын туһунан РФ Бырабыыталыстыбатын дьаһалыгар баар. Докумуон кабмин саайтыгар бэчээттэммит.
Манан сиэттэрэн, тренердэр педагогическай үлэһит статуһун ылыахтара, оччотугар бырааптара уонна эбээһинэстэрэ улаатыа. Холобур, учууталлар курдук, сылын ахсын аттестация ааһыахтара уонна квалификацияларын бигэргэтиэхтэрэ, оттон бонус быһыытынан педагогическай ыстаас ааҕыллыа.
Докумуоҥҥа сурулларынан, 2022 сыл балаҕан ыйын 1 күнүгэр диэри маннык уларыйыыларга ирдэнэр нуорма аахталарын бэлэмниэхтэрэ, оттон 2023 сыл тохсунньу 1 күнүгэр диэри миэстэлэригэр сокуон нуормаларын ылыныахтара.
-
1
-
0
-
0
-
0
-
1
-
0
