Пааматынньыгы Владимир Степанович Левин, Петр Иннокентьевич Элаков, Владислав Александрович Бурцев оҥордулар. Алгыс сиэрин-туомун кэнниттэн Оонньуулары тэрийэр бас-көс дьон тылларын эттилэр.
Алексей Федотов, Уус Алдан улууһун баһылыга:
--Дьиэ акылааттаах буоларын курдук, киһи эмиэ акылааттаах буолар. Уус Алдан дьоно-сэргэтэ бу күннэргэ ытык өбүгэбит үтүө аатыгар сүгүрүйэн, болуоссаппытыгар аатын иҥэрэн, кини мөссүөнүн кэлэр кэнчээри ыччаттарбыт көрө-истэ, ытыгылыы уонна улуу дьон сыдьааннара буолалларын өйдүү сылдьыахтара. Лөгөй Тойон, Сэһэн Ардьакыап, Иван Мигалкин, Күлүмнүүр курдук ааттара болуоссакка, улахан дыбарыастарга иҥэриллэн, улууспут саҥа үйэлэргэ, саҥа ыччакка саҥа кыахтары, кынаты үүннэрэн иһиэ диэн бигэ эрэллээхпин. Инникитин даҕаны, Уус Алдан улууһун сирэ-уота дойдуларыгар бэриниилээх, киэҥ билиилээх, ыраах санаалаах, киэҥ көҕүстээх, уһуну-киэҥи толкуйдуур дьону төрөтөн, иитэн-үөрэтэн таһаара турдун. Өрөспүүбүлүкэлэригэр, норуоттарыгар туһалаах дьон буоллуннар.
Сергей Местников, СӨ Бырабыыталыстыбатын бэрэссэдээтэлин солбуйааччыта:
-Уус Алдан улууһун ытык-мааны дьоно-сэргэтэ, ытыктабыллаах ыалдьыттар, эһигини барыгытын Саха Сирин норуоттарын VIII спортивнай оонньуулара саҕаламмыттарынан тэрийэр кэмитиэт уонна тус бэйэм ааппыттан итиитик-истиҥник эҕэрдэлиирбин көҥүллээҥ!
Бэйэм Уус Алдан улууһун ыччата буоларбыттан сүрдээҕин үөрэн-долгуйан турабын. Лөгөй сиригэр-уотугар төрөөн-үөскээн, кынат үүннэрэн, үөрэхтэнэн, үлэлээн билигин дьонум-сэргэм, Сахам Сирин туһугар үлэлии-хамныы сылдьарбыттан олус диэн астынабын уонна үөрэбин.
Уус Алдан улууһун дьоно-сэргэтэ улуу өбүгэлэрбит ааттарын үйэтитиигэ күүскэ турунан үлэлэспиттэрэ, туруорсубуттар олус бэртээхэй. Бу - биир сомоҕолоһуу, биир санаа үөскээһинин туоһута буолар. Ол курдук, үөһэттэн ким даҕаны, дьаһалтаттан даҕаны, олохтоох бэйэни салайыныыттан даҕаны, модьуйбат үлэтэ-хамнаһа оҥоһуллан турар. Ону тэҥэ, Сэһэн Ардьакыап аатынан улуустааҕы түмэл оҥоһуллан киирдэ. Майаҕатта Бэрт Хара курдук улуу киһибит аатынан бэртээхэй улахан стадион тутуллан, олоххо киирдэ. Иннибитигэр өссө элбэх үлэ-хамнас баар. Ол курдук, Владимир Заболоцкай Лөгөй Тойоҥҥо анаммыт ырыата оонньуубут үөрүүлээх арыллыытыгар ылланыаҕа. Онно клип уһуллан, күн сарсын Владимир Заболоцкай анал кэнсиэригэр сүрэхтэниэҕэ. Ону тэҥэ, Лөгөй Тойон олоҕун устуоруйатын, Арассыыйа уонна Саха Сирин доҕордоһуутун түстээһинигэр кини саамай улахан сүҥкэн оруоллааҕын туоһулуур научнай-документальнай киинэ суруллан, оҥоһуллан быйыл сыл бүтэһигэр диэри дьон көрүүтүгэр-истиитигэр тахсыаҕа. Бу буолар биһиги билиҥҥи көлүөнэ ытык дьоммутугар сүгүрүйүүбүт, кинилэргэ махталбыт.
Күндү улууһум дьоно, улуу убайдарбытын ааттара, суон сурахтара сүүһүнэн, тыһыынчанан сыл көлүөнэттэн көлүөнэҕэ тиийэ турдун! Барыгытыгар ситиһиини, чэгиэн олоҕу, кыайыыны!
-
0
-
0
-
0
-
0
-
0
-
0
