Г.М.Кривошапко аатынан Саха судаарыстыбаннай филармонията, Марфа уонна Сергей Расторгуевтар ааттарынан Судаарыстыбаннай сииркэ, Саха академическай тыйаатыра, Олоҥхо тыйаатыра биир сомоҕо буолан, умнуллубат көрдөрүүнү туруордулар. Талааннаах артыыстар аныгы технологиялары дьүөрэлии тутан, ускуустуба саҥа кырдалларын арыйдылар.
Тыыннаах доҕуһуолунан толору саалаҕа «Титаник», «Гладиатор», «Голодные игры», «Властелин колец», «Наруто», «Дюна» композициялары Alyona ID, Анастасия Алексеева, Какитока уонна Ника толордулар. Маны сэргэ Elements of dust уонна Ankarov ааптарскай бырайыактарын сүрэхтээтилэр.
Бу бэртээхэй көрдөрүү дирижёрунан Максим Ноговицын, туруорааччы режиссерунан Лена Оленова буоллулар.
Тэрийээччилэр санаалара
Тыыннаах доҕуһуол аргыстаах ыллыы-туойа сылдьар бөлөхтөрү, талааннаах ыччаттары бииргэ сомоҕолоон, филармония доҕуһуолунан биир сыанаҕа таһаарыы улахан үлэттэн тахсыбыта өйдөнөр. «Саха Сирэ маннык иһиллэр» шоуну тэрийээччи Андрей Николаев социальнай ситимигэр маннык иһитиннэрдэ:
-- Кэнсиэрдэри тэрийиинэн уонтан тахса сыл дьарыктанным. Бу иннинэ артыыстары сүрүннээн атын куораттартан, эрэгийиэннэртэн ыҥырар буоллахпына, билигин олохтоох артыыстары киэҥ араҥаҕа таһаарарга быһаарынным. Бэйэбит артыыстарбытын уонна тыйаатырдары биир сыанаҕа, биир шоуга холбоон таһаарар баҕа үөскээбитэ дьиҥинэн, син ыраатта. Ону олоххо киллэриигэ балтараа сылтан бэттэх дьарыктаммытым.
Бэйэм Саха Сирин филармониятынан олус киэн туттабын, нууччалыы эттэххэ, «фанат» буолабын. Биир да кэнсиэртэрин көтүппэккэ сылдьа сатыыбын. Кинилэр араас композияциялары туоруоралларын өрүү сэргиибин. Оттон Саха тыйаатырдарын, сииркэтин таһымнара Аан дойдуга биллэр.
Онон биһиги хамаандабыт маннык бырайыагы олоххо киллэрбиппитинэн киэн туттабыт, дьоллоохтук сананабыт. Олус судургута суох, сыралаах, бириинчик үлэ тэрилиннэ. Аныгы уонна классическай муусуканы дьүөрэлии тутан, саҥа партитура инструментовката сурулунна, элбэх эрэпэтииссийэ ыытылынна.
Билэргит курдук, артыыстар фонограмманан ыллыыллара буолуохтаҕын курдук буолбута, кэнсиэртэр онон муҥурданаллара. Ол эрээри, кэнники кэмҥэ көрөөччү ирдэбилэ улаатан, тыыннаах дорҕоон ордук сыаналанар. Хайа баҕарар кэнсиэркэ тыыннах дорҕоон доҕуһуола таһымы үрдэтэр. Иккиһинэн, социальнай ситимнэргэ тыыннаах куолаһынан ыллааччылар дьон биһирэбилин ылан эрэллэр. Бу сайдыыбыт биир көрүҥэ буолар. Чопчулаан эттэххэ, биһиги өрөспүүбүлүкэбит олохтоохторун култуураҕа ирдэбиллэрэ үрдүгүн, дьиҥ муусуканы сэҥээрээччилэр элбэхтэрин туоһулуур. Ордук үөрдэрэ, ыччат сэҥээриитэ буолар.
Онон бу курдук, Саха судаарыстыбаннай филармониятын доҕуһуолунан, улахан кэнсиэр, тыйаатыр шоута бииргэ турбута улахан ситиһиибит диэн сыаналыыбыт.
Шоуга кыттыбыт ырыаһыт Alyona ID маннык этэр:
-- Мин бэйэм идэбинэн ырыаһыппын. «Немного солнца» диэн бөлөххө ыллыыбын, айбыт ырыаларбын, кавердары толоробун. Филармония доҕуһуолунан араас кэнсиэрдэргэ эрдэ кыттан турабын. Хас сырыы ахсын эппиэтинэстээҕиттэн олус долгуйабын. «Саха Сирэ маннык иһиллэр!» бырайыак үрдүк таһымнааҕын биир көрдөрүүтэ – сыанаҕа филармония, сииркэ, саха, олоҥхо тыйаатырдара, үҥкүү ансаамбыллара, артыыстар биир сомоҕо буолан кыттарбыт буолар. Көрөөччүлэр бары астыннылар, биһиги онтон киэн туттабыт!
Галина МАТВЕЕВА
Ааптар хаартыскаҕа түһэриилэрэ
-
0
-
0
-
0
-
0
-
0
-
0
