Сокуон өҥөлөрү оҥорор урбаанньыттарга (кафелар, маҕаһыыннар, парикмахерскайдар о.д.а.), маны сэргэ уопсастыбаннай сирдэргэ иһитиннэрии табличкаларын уонна суолдьуттары туруорааччыларга туһуланар.
Кыра урбааҥҥа дьиэҕэ киириигэ сокуоҥҥа сөп түбэһиннэрэр тэрилтэ аатын биллэрэр, көрдөрөр суруктары оҥороллоругар 9 ый бэриллиэ.
Кулун тутар 1 күнүттэн Арассыыйа иһигэр үлэлиир тэрилтэлэргэ кириллицанан эрэ суруллубут ааттар көҥүллэнэллэр.
Сокуон элбэх кыбартыыралаах олорор дьиэлэр комплекстарын ааттарын толкуйдааччылары эмиэ хаарыйар. Ол курдук, тутааччылар кэммиэрчэскэй ааттары оҥорууларыгар кириллицанан эрэ туһаныахтара.
Манна даҕатан эттэххэ, сокуонунан омук тыллара букатыннаахтык бубуллаллар, туттуллубаттар диэн буолбатах. Омук буукубаларын туһаныы олус ирдэнэр буоллаҕына, нуучча тылларын анныгар кыра сириибинэн суруллуохтаах. Биллиилээх бреннэр, холобур “Dior”, суруллубутун курдук суруллуохтара.
Туһаныллар тыллар аныгы литературнай тыл нуормаларыгар сөп түбэһиэхтээхтэр. Нуормаҕа сөп түбэһиини, эбэтэр сөп түбэспэти алта тылдьыкка бэрэбиэркэлиэххэ сөп. Бигэргэммит тылдьыттарга “Российскай Федерация судаарыстыбаннай тылын быһыытынан нуучча тылын Орфографическай тылдьыта” (оҥорон таһаарааччы – РАН иһинэн В.В.Виноградов аатынан нуучча тылын үнүстүүтэ), “Российскай Федерацияҕа судаарыстыбаннай тыл быһыытынан нуучча тылын орфоэпическай тылдьыта” (РАН иһинэн В.В.Виноградов аатынан нуучча тылын үнүстүүтэ), “Омук тылларын тылдьыта” (РАН лингвистическэй чинчийиилэрин үнүстүүтэ), “Российскай Федерация судаарыстыбаннай тылы быһаарар тылдьыта” (Санкт Петербургтааҕы судаарыстыбаннай үнүбүрсүөт) киирдилэр.
-
0
-
0
-
0
-
0
-
0
-
0
