Биэнсийэ уонна Социальнай страхование пуондаларын холбоон, Арассыыйа Федерациятын биэнсийэ уонна социальнай страхованиетын пуондата тэриллэрин туһунан сокуону дьокутааттар ылыммыттара. Бэрэсидьиэн Путин онно илии баттаата, онон 2023 с. тохсунньу 1 күнүттэн үлэлээн саҕалыа. Маннык силбэспитэ дьоҥҥо табыгастаах: төлөбүрдэрин ол-бу хос докумуону ирдээбэккэ аныахтара эбэтэр сайабылыанньа эрэ көрдүөхтэрэ.
***
«Генетическэй информация национальнай базатын» оҥорор туһунан сокуон барылын көрдүлэр. Биометрическай тус дааннайдар Биир сомоҕо биометрическай тиһиккэ (БСБТ) киириэхтэрэ. Дьокутааттар бу сокуону II ааҕыыга ылыннылар.
Онуоха физическэй сирэй тус дааннайдарын блоктууру эбэтэр суох оҥорору БСБТ оператортан ирдиэн сөп.
Госдума наукаҕа уонна үрдүк үөрэххэ кэмитиэт бэрэссэдээтэлин бастакы солбуйааччыта Александр Мажуги этэринэн, генетика технологиялара – инники кэм төрдө уонна суолталаах стратегическай технологията. Аан дойдуга барытыгар генетическэй дааннай бааннара оҥоһуллаллар
***
Массыынаны кутталлаахтык ыытыы иһин эппиэтинэһи кытаатыннарар көҕүлээһини Дуумаҕа өйөөтүлэр. Рецидивистэргэ ыстараабы 300 тыһыынча солкуобайга диэри үрдэтии сокуон бакыатыгар киирэр. Ону таһынан, арыгыттан биитэр наротиктан итирэн, бырааба суох ыытыы түгэнигэр биир сылга, хаста да кэстэххэ – икки сылга тиийэ көҥүлү быһар холуобунай эппиэтинэһи киллэрии көрүллэр.
***
Куонкуруһу ыыппакка концессионнай сөбүлэһиини түһэрсии туһунан сокуону Дуума ылынна.
***
Эчэйбэтэх, иирбэтэх, дьоҥҥо саба түспэт, эмтэммэт ыарыыта суох кыыллары приюкка өлөрөрү бобор туһунан сокуон барылын Госдумаҕа киллэрдилэр.
***
От ыйын 8 күнүн, Дьиэ кэргэн, таптал уонна бэриниилээх буолуу күнүн, өрөбүл күн гынар туһунан сокуон барыла Госдумаҕа киирдэ.
***
Юридическай сирэйдэр үлэлэрин чахчыларын туһунан сибидиэнньэлэр Биир кэлим федеральнай реестригэр лизинг дуогабарын түһэрсии туһунан сибидиэнньэлэри киллэрии болдьоҕун чопчулуур туһунан сокуон барыла Госдумаҕа киллэрилиннэ.
***
Кутуу кыһыл көмүһү атыылаһарга физическэй сирэйдэр дохуоттарыгар нолуоктан босхолуохтара. Маннык сокуон III ааҕыыга ылылынна.
***
Урбаанынан дьарыктанар дьоҥҥо административнай эппиэтинэһи сымнатар сокуон барыла иккис ааҕыыга ылылынна.
Көҕүлээһин этэринэн, быраабы аан маҥнай кэспиккэ ыстараап оннугар сэрэтии бэриллиэҕэ, оттон 20 күн иһигэр ыстараап төлөннөҕүнэ, 50%-наах түһэрии оҥоһуллуоҕа.
***
Физическэй сирэйдэр Камчаткаттан 10 кг элбэх кыһыл искэҕи тиэйэн таһаараллара бобуллуоҕа. Хааччах 2025 сыл атырдьах ыйын 1 күнүгэр диэри болдьохтоох.
***
Тас реклама биир тиһик операторын туһунан сокуон барылын өссө ситэрэллэригэр Бэрэссэдээтэл Вячеслав Володин эттэ. “Эйэтэ суох дойдуларбыт рекламаларын дьиэ эркинигэр, уулусса кытыыларыгар, о.д.а көстөр миэстэҕэ иилэр аны бобуллар буолуоҕа. Кинилэр биһиги сирбитигэр барыс ылыа суохтаахтар. Ол харчыларынан Украинаҕа сэп-сэбиргэл атыылаһан биэрэллэр, онон рекламаларын тарҕатарга усулуобуйа тэрийбэппит”, -- диэтэ кини. Иккис ааҕыыга ылынардыы чочуйар сорук турда.
***
Ийэ хапытаалын сорох чааһын кэтэх дьыссаат төлөбүрүгэр туһанары көҥүллүүр сокуон барылын үһүс ааҕыыга ылыннылар.
***
Донбасс оҕолоругар күһүн оскуолаҕа баралларыгар 10 тыһыынча солкуобайы биэрэр туһунан сокуон барылын оҥорорго Володин Госдума үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэт бэрэссэдээтэлэ Ярослав Ниловка сорудахтаата.
***
Бэйэ оҥорон таһаарар бородууксуйатын элбэтэр сорук турарынан, Госдума сад уонна оҕуруот учаастагар кууруссаны, үндүүгү, о.д.а. дьиэтээҕи көтөрү уонна куруолугу иитэри көҥүллүүр сокуонун барылыгар Бэрэсидьиэн илии баттаата. Маныаха өйдүөх тустааххыт -- бэйэҕит айаххытыгар, сииргитигэр эрэ ити түргэнник ситэр салаа хаһаайыстыбатын тутаҕыт. Оттон атыыга, эргинэргэ иитэр буоллаххытына, градостроительнай регламены, бэтэринээрийнэ уонна санитарнай нуормалары тутуһаҕыт.
***
Айаннаан иһэн, бөҕү массыынаттан быраҕыы иһин улахан ыстарааптары көрөр сокуон барылын иккис ааҕыыга Госдума дьокутааттара ылыннылар.
Докумуоҥҥа суруллубутунан, массыынаттан, матасыыкылтан эбэтэр бырысыаптан талбыт сиргэр мээнэ элитэн кэбистэххэ, физическэй сирэй 10-15 тыһ. солк. ыстарааптыан сөп. Дуоһунастаахтар -- 20-30 тыһ. солкуобайга, оттон юридическай сирэйдэр -- 30-50 тыһ. солк.
Бөҕү быраҕыы түгэнин чугастааҕы камера устубут видео-матырыйааллара дакаастыахтара биитэр көрбүт дьон-сэргэ туоһу буолуо. Сыл иһигэр өссө биирдэ бу сокуону кэстэххэ, ыстараап өссө улаатар: 20-30 тыһ. солк. – көннөрү дьоҥҥо, 40-60 тыһ. солк. – дуоһунастаахтарга (административнай кэһиини оҥорбут тимир көлө бу сырыыга былдьанар). Оттон юридическай сирэйдэргэ – 60 тыһыынчаттан 100 тыһ. солкуобайга диэри уонна эмиэ конфискациялаах.
Бөҕү тыраахтартан биитэр таһаҕас массыынатыттан бырахтахха, ыстарааба маннык буолар: 40-60 тыһ. солк. – физическэй сирэйдэргэ (сокуону кэһии хатыланнаҕына – 60-70 тыһ. солк.); 60-80 тыһ. солк. – дуоһунастаах сирэйдэргэ (хатыланнаҕына – 80-100 тыһ. солк., конфискациялаах буолуон сөп); 100-120 тыһ. солк. – юридическай сирэйдэргэ (хатыланнаҕына – 150-200 тыһ. солк., тимир көлөнү былдьыахтарын сөп).
Онон бөххүтүн аналлаах сиригэр эрэ быраҕарга үөрэниҥ. Хайа муҥун, сайдыылаах XXI үйэҕэ олоробут буолбаат?
-
1
-
0
-
0
-
0
-
0
-
0
