“Нэһилиэнньэ коронавируһу утары быһыы оҥоһуллан тахсарын олус күүтэр”, – диэн миниистир кэпсээтэ. Мурашко этэринэн, быһыыны оҥоруу түһүмэхтэринэн барара былааннаммыт. Ол курдук, бастакы уочарат коронавируһу кытта ыкса үлэлии сылдьар мэдиссиинэ үлэһиттэрэ ылыахтара.
Миниистир дойду араас эрэгийиэннэригэр эпидемиологическай балаһыанньа биир тэҥ буолбатаҕын этэр. Билигин Арассыыйа үрдүнэн реанимацияҕа 3100 киһи эмтэнэ сытар. Холобур, күн бүгүн Москубаҕа ыарыы тарҕаныыта аччаата. Олохтоохтор икки ардыларыгар иммунитет үөскээн эрэр. Иллэрээ күн киин куорат мээрэ Сергей Собянин Москубаҕа быһыыны ылыы босхо буоларын туһунан эппитэ.
Мурашка Арассыыйа олохтоохторугар туһаайан, күһүөрү тымныйыы ыарыыларын утары икки быһыыны ылалларыгар сүбэлээтэ.
– Тымныйыыны (грипп) утары быһыыны ылбыт киһи күһүҥҥү дьаҥ кэмин этэҥҥэ туоруур. Ону кытта пневмококку утары быһыыны эмиэ ылар наада. Бу быһыы 5 сыл устата көмөлөһөр. Онон национальнай халандаарынан быһыыны оҥоруу кэмин күүппэккэ, билиҥҥиттэн ылан барыаххытын сөп, – диэн сүбэлээтэ.
Маны таһынан миниистир Арассыыйаҕа коронавируһу утары бастакы быһыы тургутугу этэҥҥэ ааспытын иһитиннэрдэ.
– Ааспыт бэнидиэнньиккэ Дойду көмүскэллээх буолуутун министиэристибэтэ Гамалеи аатынан эпидемиологияҕа уонна микробиологияҕа национальнай чинчийэр киинин кытта кыттыһан оҥоро сылдьар быһыылара клиническэй бэрэбиэркэни этэҥҥэ ааста. Бэрэбиэркэ түмүктэрэ бигэргэннэхтэринэ, аны судаарыстыбаннай регистрацияҕа киириэҕэ. Маны сэргэ “Вектор” киин оҥоро сылдьар быһыыта клиническэй бэрэбиэркэҕэ көҥүл ылла, – диэн миниистир иккис үөрүүлээх сонуну иһитиннэрдэ.
-
0
-
0
-
0
-
0
-
0
-
0
