Ил Түмэн бэрэссэдээтэлин солбуйааччы Антонина Григорьева Доброволецтар уопсастыбаннай ыстааптарыгар илдьэн туттарбыта. Бу гуманитарнай көмө иккис сорҕото ойуур уотуттан улахан хоромньуну сүкпүт Горнай улууһун Бэс Күөлүн олохтоохторугар анаммыта. Көмө улахан дьону уонна оҕолору утуйар таҥас араас кэмпилиэгинэн хааччыйыыга туһуламмыта.

Саллааттар ийэлэрин кэмитиэтин бэрэссэдээтэлэ, Доброволец ыстаабын волонтера Мария Емельянова этэринэн,  уоту утары охсуһууга устудьуоннар, бойобуой дьайыылар кыттыылаахтара, уоппускалаахтар уо.д.а. сүрэхтэрин баҕатынан кыттыыны ылбыттар . Дойду атын эрэгийиэннэриттэн Хабаровскайтан, Уфаттан, Чебоксарыттан, Камчатка-Петропавловскайыттан, Москубаттан, Фокиноттан кэлбиттэр. Элбэх сиртэн харчынан көмө киирбит.

  Этиллибитин курдук, Ил Түмэн дьокутааттара уонна аппараатын үлэһиттэрэ тус бэйэлэрин суоттарыгар оҥоһуллубут гуманитарнай көмөлөрүн иккитэ төхтөрүйэн туттардылар. Бастакы оҥоһуллубут көмө бородуукта, бастакы наадалаах биридимиэттэр, көмүскэнэр сириэстибэлэр, ачыкылар, респиратордар, бензопилалар, 1 туонна уматык саппараапката этэ.